ਫ਼ਤਹਿਗੜ੍ਹ ਸਾਹਿਬ: ਅੱਜ ਜਾਰੀ ਇਕ ਬਿਆਨ ਵਿਚ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਮਾਨ ਦੇ ਪ੍ਰਧਾਨ ਸ. ਸਿਮਰਨਜੀਤ ਸਿੰਘ ਮਾਨ ਵੱਲੋਂ ਕਿਹਾ ਗਿਆ ਹੈ ਕਿ ਭਾਜਪਾ ਅਤੇ ਆਰ.ਐਸ.ਐਸ. ਵੱਲੋਂ ਡਾ. ਅੰਬੇਦਕਰ ਸਾਹਿਬ ਅਤੇ ਰੰਘਰੇਟਿਆਂ ਪ੍ਰਤੀ ਉੱਠਿਆ ਹੇਜ ਵਕਤੀ ਹਿੱਤਾਂ ਤੋਂ ਪ੍ਰੇਰਿਤ ਹੈ। ੳਨ੍ਹਾਂ ਕਿਹਾ ਕਿ ਇਹ ਹੇਜ ਮਹਿਜ਼ ਚੋਣ ਢਕਵੰਜ ਹੈ।
ਸ. ਮਾਨ ਨੇ ਕਿਹਾ ਕਿ ਡਾ. ਅੰਬੇਦਕਰ ਨੇ ਹਿੰਦ ਦੇ ਵਿਧਾਨ ਵਿਚ ਗ਼ਰੀਬਾਂ, ਰੰਘਰੇਟਿਆਂ ਅਤੇ ਮਜ਼ਲੂਮਾਂ ਦੇ ਹੱਕ-ਹਕੂਕਾ ਨੂੰ ਸੁਰੱਖਿਅਤ ਕਰਨ ਲਈ ਮਜ਼ਬੂਤ ਪ੍ਰਬੰਧ ਕੀਤੇ ਸਨ ਪਰ ਹਿੰਦੂਤਵੀ ਬਹੁਗਿਣਤੀ ਨੇ ਵਿਧਾਨ ਵਿਚ ਸੈਕੜਿਆਂ ਵਾਰ ਤਬਦੀਲੀਆ ਕਰਕੇ ਡਾ. ਅੰਬੇਦਕਰ ਦੇ ਵੱਲੋਂ ਇਸ ਵਿਧਾਨ ਰਾਹੀ ਸਿਰਜੇ ਜਾਣ ਵਾਲੇ ਬਰਾਬਰਤਾ ਅਤੇ ਅੱਛੇ ਸਮਾਜ ਦੀ ਭਾਵਨਾ ਨੂੰ ਬਿਲਕੁਲ ਖ਼ਤਮ ਕਰ ਦਿੱਤਾ।
ਉਨ੍ਹਾਂ ਕਿਹਾ ਕਿ ਜਦੋਂ 1950 ਵਿਚ ਇਹ ਵਿਧਾਨ ਲਾਗੂ ਹੋਇਆ ਸੀ ਤਾਂ ਆਰ.ਐਸ.ਐਸ. ਇਸ ਵਿਧਾਨ ਨੂੰ ਬਿਲਕੁਲ ਨਹੀਂ ਸੀ ਮੰਨਦੀ ਕਿਉਂਕਿ ਇਹ ਹਿੰਦੂਤਵੀ ਜਥੇਬੰਦੀ ਮਨੂੰ ਸਿਮਰਤੀ ਨੂੰ ਮੰਨਦੀ ਹੈ, ਜਿਸ ਅਨੁਸਾਰ ਮਜਲੂਮਾਂ ਦੇ ਕੋਈ ਹੱਕ ਨਹੀਂ ਸਨ। ਲੇਕਿਨ ਅੱਜ ਆਪਣੀ ਵੋਟ ਸਿਆਸਤ ਨੂੰ ਮੁੱਖ ਰੱਖਦੇ ਹੋਏ ਭਾਜਪਾ ਤੇ ਆਰ. ਐਸ. ਐਸ. ਆਦਿ ਫਿਰਕੂ ਜਮਾਤਾਂ ਡਾ. ਅੰਬੇਦਕਰ ਸਾਹਿਬ ਦੀ ਆਪਣੇ ਸਵਾਰਥੀ ਹਿੱਤਾ ਦੀ ਪੂਰਤੀ ਲਈ ਪ੍ਰਸੰਸ਼ਾਂ ਕਰ ਰਹੇ ਹਨ।
ਉਨ੍ਹਾਂ ਕਿਹਾ ਕਿ ਇਹਨਾਂ ਫਿਰਕੂ ਹੁਕਮਰਾਨਾਂ ਦੇ ਮਨ ਵਿਚ ਅੱਜ ਵੀ ਮਨੂੰ ਸਿਮਰਤੀ ਦੀ ਮਨੁੱਖਤਾ ਵਿਰੋਧੀ ਸੋਚ ਪ੍ਰਬਲ ਹੈ ਅਤੇ ਉਸ ਨੂੰ ਅਮਲੀ ਰੂਪ ਦੇਣਾ ਚਾਹੁੰਦੇ ਹਨ।
ਸ. ਮਾਨ ਨੇ ਕਿਹਾ ਕਿ ਆਪਣੇ ਮਨਸੂਬਿਆਂ ਦੀ ਪੂਰਤੀ ਲਈ ਭਾਜਪਾ ਤੇ ਆਰ. ਐਸ. ਐਸ. ਡਾ. ਅੰਬੇਦਕਰ ਅਤੇ ਰੰਘਰੇਟਿਆਂ ਪ੍ਰਤੀ ਬਣਾਉਟੀ ਪਿਆਰ ਅਤੇ ਸਤਿਕਾਰ ਜਤਾ ਰਹੀਆਂ ਹਨ। ਮਾਨ ਦਲ ਦੇ ਮੁਖੀ ਨੇ ਅੱਗੇ ਦਾਅਵਾ ਕੀਤਾ ਕਿ ਭਾਜਪਾ ਤੇ ਆਰ. ਐਸ. ਐਸ. ਵਰਗੀਆਂ ਵਿਰਕੂ ਜਮਾਤਾਂ ਕਦੀ ਵੀ ਰੰਘਰੇਟਿਆ ਅਤੇ ਗ਼ਰੀਬਾਂ ਨੂੰ ਭਰਮਾ ਕੇ ਉਨ੍ਹਾਂ ਦੀਆਂ ਵੋਟਾਂ ਪ੍ਰਾਪਤ ਨਹੀਂ ਕਰ ਸਕਣਗੀਆਂ।
ਸ. ਮਾਨ ਨੇ ਅੰਤ ਵਿਚ ਹਿੰਦ ਵਿਚ ਵੱਸਣ ਵਾਲੇ ਰੰਘਰੇਟਿਆ, ਗ਼ਰੀਬਾਂ, ਮਜ਼ਲੂਮਾਂ, ਲਤਾੜੇ ਵਰਗਾਂ ਨੂੰ ਉਚੇਚੇ ਤੌਰ ਤੇ ਅਪੀਲ ਕਰਦੇ ਹੋਏ ਕਿਹਾ ਕਿ ਬੀਜੇਪੀ, ਆਰ.ਐਸ.ਐਸ. ਆਦਿ ਹਿੰਦੂਤਵ ਜਮਾਤਾਂ ਨੇ ਨਾ ਬੀਤੇ ਸਮੇਂ ਵਿਚ, ਨਾ ਅਜੋਕੇ ਸਮੇਂ ਵਿਚ ਉਪਰੋਕਤ ਵਰਗਾਂ ਨੂੰ ਬਰਾਬਰਤਾ ਦੇ ਹੱਕ ਅਤੇ ਇਨਸਾਫ ਦਿੱਤਾ ਅਤੇ ਨਾ ਹੀ ਇਹ ਭਵਿੱਖ ਵਿਚ ਅਜਿਹਾ ਆਪਣੀ ਸੌੜੀ ਸੋਚ ਕਾਰਨ ਕਰ ਸਕਣਗੇ। ਇਸ ਲਈ ਉਪਰੋਕਤ ਵਰਗ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਅਤੇ ਇਸ ਦੀਆਂ ਸਹਿਯੋਗੀ ਜਥੇਬੰਦੀਆਂ ਜੋ ਗੁਰੂ ਸਾਹਿਬਾਨ ਦੀ ਸਰਬੱਤ ਦੇ ਭਲੇ ਵਾਲੀ ਮਨੁੱਖਤਾ ਪੱਖੀ ਸੋਚ ਨੂੰ ਲੈਕੇ ਇਥੇ ਸਮੱੁਚੇ ਵਰਗਾਂ ਦਾ ਸਾਂਝਾ ਬਰਾਬਰਤਾ ਦੀ ਸੋਚ ਵਾਲਾ ਰਾਜ ਪ੍ਰਬੰਧ ਕਾਇਮ ਕਰਨਾ ਚਾਹੁੰਦੇ ਹਨ, ਉਹਨਾਂ ਨੂੰ ਆਉਣ ਵਾਲੀਆਂ ਅਸੈਬਲੀ ਅਤੇ ਐਸ.ਜੀ.ਪੀ.ਸੀ. ਦੀਆਂ ਚੋਣਾਂ ਵਿਚ ਇਮਾਨਦਾਰੀ ਨਾਲ ਸਾਥ ਦੇਣ।
