ਰਾਮਪੁਰਾ ਫੂਲ ( 12 ਅਕਤੂਬਰ, 2014): ਬਰਨਾਲਾ ਅਤੇ ਜੈਤੋ ਵਿੱਚ ਮਾਰੂ ਹਥਿਆਰਾਂ ਨਾਲ ਲੈਸ਼ ਹੋਕੇ ਮਾਰਚ ਕਰਨ ਤੋਂ ਬਾਅਦ ਫਿਰਕੂ ਸੰਗਠਨ ਆਰ. ਐੱਸ. ਐੱਸ ਦੇ ਕਾਰਕੂਨਾਂ ਵੱਲੋਂ ਹੁਣ ਬਠਿੰਡਾ ਜਿਲੇ ਵਿੱਚ ਡਾਗਾਂ ਮੋਢਿਆਂ ਨਾਲ ਰੱਖਕੇ ਸ਼ਕਤੀ ਪ੍ਰਦਰਸ਼ਨ ਕੀਤਾ ਗਿਆ।ਇਸ ਤੋਂ ਪਹਿਲ਼ਾਂ ਆਰ.ਐੱਸ.ਐੱਸ ਵੱਲੋਂ ਕੀਤੇ ਗਏ ਹਥਿਆਰਬੰਦ ਪ੍ਰਦਰਸ਼ਨ ਦੀ ਚਾਰ ਚੁਫੇਰਿਉ ਹੋ ਰਹੀ ਨੁਕਤਾਚੀਨੀ ਕਰਕੇ ਸ਼ਾਇਦ ਇਸ ਮਾਰਚ ਵਿੱਚ ਮਾਰੂ ਹਥਿਆਰਾਂ ਦੀ ਪ੍ਰਦਰਸ਼ਨੀ ਨਹੀਂ ਕੀਤੀ।
ਜਦੋ ਦੀ ਕੇਂਦਰ ਵਿੱਚ ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਭਾਜਪਾ ਸਰਕਾਰ ਹੋਂਦ ਵਿੱਚ ਆਈ ਹੈ, ਉਦੋਂ ਆਰ. ਐੱਸ.ਐੱਸ ਅਤੇ ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੀਆਂ ਕਾਰਵਾਈਆਂ ਵਿੱਚ ਚੋਖਾ ਵਾਧਾ ਹੋਇਆਂ ਹੈ ਅਤੇ ਪੰਜਾਬ ਨੂੰ ਆਰ. ਐੱਸ. ਐੱਸ ਨੇ ਆਪਣੀਆਂ ਸਰਗਰਮੀਆਂ ਦਾ ਕੇਂਦਰ ਬਣਾ ਲਿਆ ਹੈ।ਸੰਘ ਮੁਖੀ ਮੋਹਨ ਭਾਗਵਤ ਦੀਆਂ ਉਪਰੋ-ਥਲੀ ਭੇਰੀਆਂ ਇਹ ਸਪੱਸ਼ਟ ਕਰਦੀਆਂ ਹਨ ਕਿ ਆਰ. ਐੱਸ. ਐੱਸ ਪੰਜਾਬ ਵਿੱਚ ਵਿਸ਼ੇਸਸ਼ ਜੋਰ ਦੇ ਰਿਹਾ ਹੈ।
ਕੇਂਦਰ ਵਿੱਚ ਮੋਦੀ ਆਉਣ ਤੋਂ ਬਾਅਦ ਪੰਜਾਬ ਵਿੱਚ ਚੰਗੇ ਦਿਨ ਆਉਣ ਦੀ ਬਜ਼ਾਏ ਫਿਰਕੂ ਮੰਨੂਵਾਦੀ ਹਿੰਦੂਚਵੀ ਜੱਥੇਬੰਦੀਆਂ ਦਾ ਪ੍ਰਛਾਵਾਂ ਗਾੜਾ ਅਤੇ ਖਤਰਨਾਖ ਹੁੰਦਾ ਜਾ ਰਿਹਾ ਹੈ ਅਤੇ ਪੰਜਾਬ ਦੀ ਧਰਤੀ ‘ਤੇ ਆਰ. ਐੱਸ. ਐੱਸ ਦੀ ਇਹ ਕਾਰਵਾਈਆਂ ਭਵਿੱਖ ਦੀ ਕਿਸੇ ਖਤਰਨਾਖ ਯੋਜਨਾ ਦੀ ਦੱਸ ਪਾਉਦੀਆਂ ਹਨ।
ਆਰ.ਐੱਸ. ਐੱਸ ਦੀ ਸਥਾਨਕ ਇਕਾਈ ਵੱਲੋਂ ਦੇਵ ਸਮਾਜ ਸਕੂਲ ਵਿੱਚ ਸ਼ਸ਼ਤਰ ਪੂਜਾ ਕਰਨ ਉਪਰੰਤ ਸ਼ਹਿਰ ਦੇ ਵੱਖ ਵੱਖ ਬਜ਼ਾਰਾਂ ਵਿੱਚ ਰੂਟ ਮਾਰਚ ਕੀਤਾ।ਜਿਸ ਵਿੱਚ ਵੱਡੀ ਗਿਣਤੀ ਵਿੱਚ ਸੰਘ ਦੇ ਮੈਂਬਰਾਂ ਨੇ ਭਾਗ ਲ਼ਿਆ।
ਸ਼ਸ਼ਤਰ ਪੂਜਾ ਮੌਕੇ ਆਰ. ਐੱਸ. ਐਸ ਦੇ ਜਿਲਾ ਅਧਿਕਾਰੀ ਡਾ:ਚੰਚਲ ਮਲਹੋਤਰਾ ਨੇ ਕਿਹਾ ਕਿ ਆਰ.ਐੱਸ.ਐੱਸ ਦੀ ਸਥਾਪਨਾ ਦੁਸਹਿਰੇ ਦੇ ਦਿਨ ਨਾਗਪੁਰ ਵਿੱਚ ਕੀਤੀ ਗਈ ਸੀ। ਆਰ. ਐੱਸ. ਐੱਸ ਦੇ ਸੰਗਠਨ ਵਿੱਚ ਆਉਣ ਵਾਲੇ ਹਰ ਸਵੈ ਸੇਵਕ ਲਈ ਸ਼ਰੀਰਕ ਅਤੇ ਬੌਧਿਕ ਵਿਕਾਸ ਕੀਤਾ ਜਾਂਦਾ ਹੈ ਤੇ ਉਸਨੂੰ ਭਾਰਤ ਦੀ ਪ੍ਰਚੀਨ ਸੰਸਕ੍ਰਿਤੀ ਨਾਲ ਜੋੜਿਆ ਜਾਂਦਾ ਹੈ।ਸ਼ਸ਼ਤਰ ਪੂਜਾ ਰਾਹੀਂ ਅਸੀਂ ਸ਼ਕਤੀ ਦੀ ਪੂਜਾ ਕਰਦੇ ਹਾਂ ਇਸ ਲਈ ਸ਼ਖਤੀ ਦੇ ਪ੍ਰਤੀਕ ਹਥਿਆਰਾਂ ਦਾ ਪ੍ਰਯੋਗ ਕੀਤਾ ਜਾਂਦਾ ਹੈ।
ਇਸ ਮੌਕੇ ਨਗਰ ਸੰਘ ਸੰਚਾਲਕ ਅੰਮ੍ਰਿਤ ਗਰਗ, ਸੁਨੀਲ ਗਰਗ, ਨਗਰ ਕੌਸਲ ਦੇ ਸਾਬਕਾ ਪ੍ਰਧਾਨ ਤੇ ਭਾਜਪਾ ਆਗੂ ਮੱਖਣ ਜਿੰਦਲ,ਭਾਜਪਾ ਮੰਡਲ ਪ੍ਰਧਾਨ ਭਾਰਤ ਭੂਸ਼ਨ ਗਰਗ ਆਦ ਮੌਜੂਦ ਸਨ।
