ਨਵੀਂ ਦਿੱਲੀ (ਸਿੱਖ ਸਿਆਸਤ ਬਿਊਰੋ): ਭਾਰਤ ਦੀ ਕੇਂਦਰੀ ਸੱਤਾ ‘ਤੇ ਕਾਬਜ਼ ਭਾਜਪਾ ਜਨਤਾ ਪਾਰਟੀ (ਭਾਜਪਾ) ਦਾ ਮੁੱਖ ਏਜ਼ੰਡਾ ਭਾਰਤ ਵਿੱਚ ਭਗਵਾਕਰਨ ਦੀ ਲਹਿਰ ਨੂੰ ਮਜਬੂਤ ਕਰਕੇ ਹਿੰਦੂਤਵ ਦਾ ਹਰ ਪਾਸੇ ਰੰਗ ਚਾੜਨਾ ਹੈ। ਇਸ ਸਬੰਧ ਵਿੱਚ ਭਾਜਪਾ ਦੀ ਮੁੱਢਲੀ ਜੱਥੇਬੰਦੀ ਰਾਸ਼ਟਰੀਯ ਸਵੈਸੇਵਕ ਸੰਘ (ਆਰ. ਐੱਸ. ਐੱਸ) ਭਾਰਤ ਵਿੱਚ ਚੱਲ ਰਹੇ ਵਿੱਦਿਅਕ ਢਾਂਚੇ, ਪਾਠ ਪੁਸਤਕਾਂ ਅਤੇ ਇਤਿਹਾਸਕ ਪੁਸਤਕਾਂ ਨੂੰ ਪੂਰਨ ਰੂਪ ਵਿੱਚ ਭਰਵੇ ਰੰਗ ਵਿੱਚ ਰੰਗਣ ਦੀ ਮੁਹਿੰਮ ‘ਤੇ ਕੰਮ ਕਰ ਰਹੀ ਹੈ।
ਇਸੇ ਕੜੀ ਵਿੱਚ ਹੀ ਭਾਰਤ ਦੇ ਮਨੁੱਖੀ ਸਰੋਤ ਮੰਤਰਾਲੇ ਵੱਲੋਂ ਸੋਮਵਾਰ ਨੂੰ ਆਰ. ਐੱਸ. ਐੱਸ ਦੇ ਹਫਤਾਵਾਰੀ ਰਸਾਲੇ “ਪੰਚਜਾਨਯ” ਦੇ ਸਾਬਕਾ ਸੰਪਾਦਕ ਬਲਦੇਵ ਸ਼ਰਮਾ ਨੂੰ ਭਾਰਤ ਸਰਕਾਰ ਦੇ ਅਦਾਰੇ ‘ਨੈਸ਼ਨਲ ਬੁੱਕ ਟਰੱਸਟ’ ਦਾ ਨਵਾਂ ਚੇਅਰਮੈਨ ਥਾਪਿਆ ਹੈ। ਉਸਦਾ ਕਾਰਜ਼ਕਾਲ ਤਿੰਨ ਸਾਲ ਦਾ ਹੋਵੇਗਾ।
ਇਸ ਸਮੇਂ ਇੱਕ ਰੋਜ਼ਾਨਾ ਹਿੰਦੀ ਅਖਬਾਰ ਲਈ ਕੰਮ ਕਰਦਾ 59 ਸਾਲਾ ਬਲਦੇਵ ਸ਼ਰਮਾ ਪੱਤਰਕਾਰੀ ਦੇ ਖੇਤਰ ਵਿੱਚ ਉਹ ਪਿੱਛਲੇ 35 ਸਾਲਾਂ ਤੋਂ ਕੰਮ ਕਰ ਰਿਹਾ ਹੈ। ਉਹਨੇ 2008 ਤੋਂ 2013 ਤੱਕ ਆਰ. ਐੱਸ. ਐੱਸ ਦੇ ਰਸਾਲੇ ਵਿੱਚ “ਪੰਚਜਾਨਯ” ਦੇ ਸੰਪਾਦਕ ਵਜੋਂ ਕੰਮ ਕੀਤਾ ਹੈ ਅਤੇ ਇਸਤੋਂ ਇਲਾਵਾ ਗਵਾਲੀਅਰ, ਰਾਏਪੁਰ, ਵਾਰਾਨਸੀ, ਅਤੇ ਪਾਣੀਪਤ ਵਿੱਚ ਵੱਖ-ਵੱਖ ਅਖਬਾਰਾਂ ਦੇ ਵਿੱਚ ਵੀ ਕੰਮ ਕਰਦਾ ਰਿਹਾ ਹੈ।
ਨੈਸ਼ਨਲ ਬੁੱਕ ਟਰੱਸਟ ਦੇ ਚੇਅਰਮੈਨ ਵਜੋਂ ਸ਼ਰਮਾ ਦੀ ਭੂਮਿਕਾ ਅੰਗਰੇਜ਼ੀ ਅਤੇ ਹਿੰਦੀ ਤੋਂ ਇਲਾਵਾ ਭਾਰਤ ਦੀਆਂ ਖੇਤਰੀ ਭਾਸ਼ਾਵਾਂ ਵਿੱਚ ਛਪਣ ਵਾਲੀਆਂ ਕਿਤਾਬਾਂ ਦੇ ਕੰਮਕਾਰ ਦੀ ਨਿਗਰਾਨੀ ਕਰਨਾ ਹੈ।
1957 ਵਿੱਚ ਹੋਂਦ ਵਿੱਚ ਆਏ ਨੈਸ਼ਨਲ ਬੁੱਕ ਟਰੱਸਟ ਪੁਰਾਤਨ ਸਾਹਿਤ ਨੂੰ ਪ੍ਰਕਾਸ਼ਿਤ ਕਰ ਦੇ ਨਾਲ ਨਾਲ ਭਾਰਤੀ ਲੇਖਕਾਂ ਦੀਆਂ ਲਿਖਤਾਂ ਨੂੰ ਛਾਪਣਾ ਅਤੇ ਹੋਰ ਭਾਰਤੀ ਭਾਸ਼ਾਵਾਂ ਵਿੱਚ ਤਰਜ਼ਮਾਂ ਕਰਨ ਦਾ ਕਾਰਜ਼ ਨਿਭਾ ਰਿਹਾ ਹੈ। ਇਹ ਟਰੱਸਟ ਕਿਤਾਬ ਮੇਲਿਆਂ, ਕਿਤਾਬ ਕਲੱਬ ਦਾ ਅਯੋਜਨ ਸੰਸਾਰ ਭਰ ਵਿੱਚ ਕਰਦਾ ਹੈ।ਬਲਦੇਵ ਸ਼ਰਮਾਂ ਨੂੰ ਇਸ ਟਰੱਸਟ ਦਾ ਮੁਖੀ ਥਾਪਣਾ ਭਾਰਤ ਵਿੱਚ ਸਰਕਾਰੀ ਤੌਰ ‘ਤੇ ਛਪ ਰਹੀਆਂ ਕਿਤਾਬਾਂ ਨੂੰ ਹਿੰਦੂਤਵ ਦਾ ਵਾਹਿਕ ਬਣਾਉਣ ਵੱਲ ਪੁੱਟਿਆ ਗਿਆ ਇੱਕ ਪ੍ਰਮੁੱਖ ਕਦਮ ਹੈ।
ਪੁਰਾਤਨ ਇਤਿਹਾਸ ਨੂੰ ਵੀ ਸੰਘਵਾਦ ਪੱਖੀ ਰੰਗਤ ਦੇਣ ਲਈ ਇੱਕ ਵੱਖਰੇ ਹੁਕਮ ਰਾਹੀਂ ਕੇਂਦਰ ਸਰਕਾਰ ਨੇ 18 ਮੈਂਬਰੀ ਭਾਰਤੀ ਖੋਜ ਕੌਂਸਲ ਦਾ ਪੂਨਰ ਗਠਨ ਕੀਤਾ ਹੈ, ਜਿਸ ਵਿੱਚ ਆਰ. ਐੱਸ,.ਐੱਸ ਦੇ ਪਿਛੋਕੜ ਵਾਲੇ ਕੁਝ ਵਿਦਵਾਨਾਂ ਨੂੰ ਵਿਸ਼ੇਸ਼ ਤੌਰ ‘ਤੇ ਸ਼ਾਮਲ ਕੀਤਾ ਹੈ।
ਇਸ ਨਵੀ ਬਣਾਈ ਟੀਮ ਵਿੱਚੋਂ ਬਹੁਤੇ ਵਿਦਾਵਨ ਪੁਰਾਤਨ ਇਤਿਹਾਸ ਦੀ ਖੋਜ ਕਰਨ ਦੇ ਖੇਤਰ ਨਾਲ ਸਬੰਧਿਤ ਹਨ, ਜਿੰਨਾਂ ਵਿੱਚ ਨਰੈਣ ਰਾਓੁ, ਬ੍ਰਹਮਪੁਰ ਯੁਨੀਵਰਸਿਟੀ ਉੜੀਸਾ ਅਤੇ ਪੁਰਾਤਨ ਇਤਿਹਾਸ ਦੇ ਪ੍ਰੋ. ਇਸ਼ਵਰ ਸ਼ਰਨ ਵਿਸ਼ਵਕਰਮਾ ਗੋਰਖਪੁਰ ਯੁਨੀਵਰਸਿਟੀ ਸ਼ਾਮਲ ਹਨ। ਇਹ ਦੋਵੇਂ ਵਿਅਕਤੀ ਆਰ. ਐੱਸ.ਐੱਸ ਦੀ ਸਰਪ੍ਰਸਤੀ ਵਾਲੀ ਖੋਜ ਸੰਸਥਾ “ਇਤਿਹਾਸ ਸੰਕਲਨ ਸਿਮਤੀ” ਦੇ ਮੈਂਬਰ ਹਨ।
ਸੰਘ ਦੀ ਇਸ ਸੰਸਥਾ ਦਾ ਰਾਓੁ ਮੀਤ ਪ੍ਰਧਾਨ ਹੈ, ਜਦਕਿ ਵਿਸ਼ਵਕਰਮਾ ਇਸਦਾ ਜਨਰਲ ਸਕੱਤਰ ਹੈ।
