ਅੰਮ੍ਰਿਤਸਰ (18 ਫਰਵਰੀ, 2015): ਦਿੱਲੀ ਵਿੱਚ ਆਮ ਆਦਮੀ ਪਾਰਟੀ ਵੱਲੋਂ ਹੁੰਝਾ ਫੇਰ ਜਿੱਤ ਜਿੱਤਣ ਤੋ ਬਾਅਦ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਨਤਮਸਤਕ ਹੋਣ ਲਈ ਪੁੱਜੇ ਭਗਵੰਤ ਮਾਨ ਨੇ ਕਿਹਾ ਕਿ ਦਿੱਲੀ ਵਿੱਚ ਆਮ ਆਦਮੀ ਪਾਰਟੀ ਦੀ ਇਤਿਹਾਸਕ ਜਿੱਤ ਹੋਈ ਹੈ ਜਿਸ ਨੇ ਪਾਰਟੀ ਵਰਕਰਾਂ ਦੇ ਹੌਸਲੇ ਬੁਲੰਦ ਕਰ ਦਿੱਤੇ ਹਨ ਅਤੇ ਪੰਜਾਬ ਵਿਧਾਨ ਸਭਾ ਚੋਣਾਂ ਵਿੱਚ ਵੀ ਇਹ ਫਾਰਮੂਲਾ ਅਪਨਾਇਆ ਜਾਵੇਗਾ ਤਾਂ ਕਿ ਅਕਾਲੀ ਭਾਜਪਾ ਗਠਜੋੜ ਤੇ ਕਾਂਗਰਸ ਦਾ ਬੋਰੀਆ ਬਿਸਤਰਾ ਗੋਲ ਕਰਕੇ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਾਈ ਜਾ ਸਕੇ।
ਭਗਵੰਤ ਮਾਨ 17 ਫਰਵਰੀ ਨੂੰ ਅੰਮ੍ਰਿਤਸਰ ‘ਚ ਰੋਡ ਸ਼ੋਅ ਦੌਰਾਨ
ਪੰਜਾਬ ਵਿੱਚ ਕਿਸੇ ਵੀ ਦੂਸਰੀ ਹਮ ਖਿਆਲੀ ਪਾਰਟੀ ਨਾਲ ਸਮਝੌਤਾ ਕਰਨ ਬਾਰੇ ਪੁੱਛੇ ਜਾਣ ਤੇ ਸ੍ਰੀ ਮਾਨ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੇ ਸੰਵਿਧਾਨ ਵਿੱਚ ਦਰਜ ਹੈ ਕਿਸੇ ਵੀ ਪਾਰਟੀ ਨਾਲ ਕੋਈ ਵੀ ਚੋਣ ਗਠਜੋੜ ਦਾ ਸਮਝੌਤਾ ਨਹੀ ਕੀਤਾ ਜਾਵੇਗਾ ਅਤੇ ਚੋਣ ਕਮਿਸ਼ਨ ਨੂੰ ਪਾਰਟੀ ਨੇ ਇਸ ਬਾਰੇ ਲਿਖ ਕੇ ਦਿੱਤਾ ਹੋਇਆ ਹੈ। ਉਹਨਾਂ ਕਿਹਾ ਕਿ ਜੇਕਰ ਕੋਈ ਪਾਰਟੀ ਆਮ ਆਦਮੀ ਪਾਰਟੀ ਵਿੱਚ ਸ਼ਮੂਲੀਅਤ ਕਰਨਾ ਚਾਹੁੰਦੀ ਹੈ ਤਾਂ ਉਸ ਦਾ ਸੁਆਗਤ ਕੀਤਾ ਜਾਵੇਗਾ।
ਧੂਰੀ ਵਿਧਾਨ ਸਭਾ ਚੋਣ ਲੜਨ ਬਾਰੇ ਅਗਲੇ ਦੋ ਚਾਰ ਦਿਨਾਂ ਵਿੱਚ ਫੈਸਲਾ ਕੀਤੇ ਜਾਣ ਬਾਰੇ ਉਹਨਾਂ ਕਿਹਾ ਕਿ ਧੂਰੀ, ਤਲਵੰਡੀ ਸਾਬੋ ਆਦਿ ਚੋਣਾਂ ਕਰਾਉਣ ਦੀ ਕੋਈ ਲੋੜ ਨਹੀ ਸੀ ਪਰ ਅਕਾਲੀ ਭਾਜਪਾ ਨੇ ਜਿਥੇ ਪੰਜਾਬ ਵਿੱਚ ਸਮਾਜਿਕ ਬੁਰਾਈਆ ਨੂੰ ਪਨਪਨ ਦਿੱਤਾ ਹੈ ਤੇ ਬਿਕਰਮ ਸਿੰਘ ਮਜੀਠੀਏ ਵਰਗੇ ਨਸ਼ਿਆ ਦੀ ਤਸਕਰੀ ਕਰਨ ਦੇ ਕਿੰਗ ਪਿੰਨ ਸਾਬਤ ਹੋ ਰਹੇ ਹਨ ਉਥੇ ਅਕਾਲੀ ਦਲ ਵਾਲੇ ਆਪਣੇ ਬਹੁਮਤ ਬਣਾਉਣ ਲਈ ਹੀ ਅਜਿਹੇ ਹੱਥਕੰਡੇ ਵਰਤ ਤੇ ਬੇਲੋੜਾ ਖਜ਼ਾਨੇ ਤੋ ਬੋਝ ਪਾ ਰਹੇ ਹਨ ਕਿਉਕਿ ਅਕਾਲੀਆ ਨੂੰ ਹੁਣ ਭਾਜਪਾਈਆ ਤੇ ਵਿਸ਼ਵਾਸ਼ ਨਹੀ ਰਿਹਾ ਜਿਸ ਕਰਕੇ ਨਗਰ ਕੌਸਲਾਂ ਦੀਆ ਚੋਣਾਂ ਵਿੱਚ ਵੀ ਕਈ ਥਾਵਾਂ ਤੇ ਦੋਵੇ ਧਿਰਾਂ ਆਹਮੋ ਸਾਹਮਣੇ ਹਨ।
ਦਿੱਲੀ ਚੋਣਾਂ ਬਾਰੇ ਉਹਨਾਂ ਕਿਹਾ ਕਿ ਦਿੱਲੀ ਵਿੱਚ ਕੁਲ 70 ਹਲਕੇ ਸਨ ਜਿਹਨਾਂ ਵਿੱਚੋ ਰਾਜੌਰੀ ਗਾਰਡਨ ਹਲਕਾ ਸਭ ਤੋ ਵੱਧ ਸੰਵੇਦਨਸ਼ੀਲ ਸੀ ਕਿਉਕਿ ਇਸ ਹਲਕੇ ਦਾ ਇੰਚਾਰਜ ਅਕਾਲੀਆ ਨੇ ਬਿਕਰਮ ਸਿੰਘ ਮਜੀਠੀਏ ਨੂੰ ਬਣਾਇਆ ਸੀ ਜਿਸ ਨੇ ਨਸ਼ੀਲੇ ਪਦਾਰਥਾਂ ਦੀਆ ਇਥੇ ਨਦੀ ਵਹਾ ਦਿੱਤੀ ਤੇ ਸਾਰੇ ਪੰਜਾਬ ਦਾ ਮੰਤਰੀ ਮੰਡਲ ਇਸ ਹਲਕੇ ਵਿੱਚ ਲੱਗਾ ਹੋਇਆ ਸੀ ਪਰ ਦਿੱਲੀ ਦੇ ਲੋਕਾਂ ਨੇ ਉਹਨਾਂ ਨੂੰ ਘਾਹ ਨਹੀ ਪਾਇਆ ਤੇ ਉਹਨਾਂ ਦਾ ਉਮੀਦਵਾਰ ਮਨਜਿੰਦਰ ਸਿੰਘ ਸਿਰਸਾ ਦਸ ਹਜ਼ਾਰ ਵੱਧ ਵੋਟਾਂ ਤੋ ਹਾਰ ਗਿਆ।
ਉਹਨਾਂ ਕਿਹਾ ਕਿ ਮਜੀਠੀਏ ਦੀ ਵਜਾ ਕਰਕੇ ਪਹਿਲਾਂ ਪੰਜਾਬ ਵਿੱਚ ਅਰੂਣ ਜੇਤਲੀ ਦੀ ਜਮਾਨਤ ਜਬਤ ਹੋਈ ਤੇ ਹੁਣ ਦਿੱਲੀ ਵਿੱਚ ਜੋ ਹਸ਼ਰ ਅਕਾਲੀ ਦਲ ਤੇ ਭਾਜਪਾ ਦਾ ਹੋਇਆ ਸੀ ਉਸ ਦਾ ਇੱਕ ਪਹਿਲੂ ਮਜੀਠੀਏ ਦੀ ਚੋਣ ਵਿੱਚ ਸ਼ਮੂਲੀਅਤ ਵੀ ਸੀ।
ਦਿੱਲੀ ਸਰਕਾਰ ਦੀ ਪ੍ਰਾਥਮਿਕਤਾ ਬਾਰੇ ਪੁੱਛੇ ਜਾਣ ਤੇ ਉਹਨਾਂ ਕਿਹਾ ਕਿ ਸ੍ਰੀ ਅਰਵਿੰਦ ਕੇਜਰੀਵਾਲ ਨੇ ਸਭ ਤੋ ਪਹਿਲਾਂ 2013 ਵਿੱਚ ਆਮ ਆਦਮੀ ਪਾਰਟੀ ਦੀ ਬਣੀ ਸਰਕਾਰ ਸਮੇਂ ਦਿੱਲੀ ਸਿੱਖ ਕਤਲੇਆਮ ਦੇ ਦੋਸ਼ੀਆ ਨੂੰ ਸਜਾਵਾਂ ਦਿਵਾਉਣ ਲਈ ਬਣਾਈ ਗਈ ਵਿਸ਼ੇਸ਼ ਜਾਂਚ ਦਸਤੇ ਦੀ ਫਾਈਲ ਮੰਗਵਾਈ ਹੈ ਤਾਂ ਕਿ ਦੋਸ਼ੀਆ ਨੂੰ ਕਨੂੰਨ ਦੇ ਹਵਾਲੇ ਕੀਤਾ ਜਾ ਸਕੇ।
