ਅੰਮ੍ਰਿਤਸਰ (9 ਜੁਲਾਈ, 2015): ਜਥੇਬੰਦੀ ਦੀ ਮਜ਼ਬੂਤੀ ਅਤੇ ਘੇਰੇ ਨੂੰ ਵਿਸ਼ਾਲ ਕਰਨ ਦੇ ਉਦੇਸ਼ ਨਾਲ, ਦਲ ਖਾਲਸਾ ਨੇ ਪੰਜਾਬ ਅਤੇ ਵਿਦੇਸ਼ਾਂ ਅੰਦਰ ਆਪਣਾ ਜਥੇਬੰਦਕ ਢਾਂਚਾ ਨਵੇਂ ਸਿਰਿਉਂ ਉਸਾਰਨ ਦਾ ਫੈਸਲਾ ਲਿਆ ਹੈ ।
ਇਹ ਫੈਸਲਾ ਪਾਰਟੀ ਦੀ ਹੋਈ ਮੀਟਿੰਗ ਦੌਰਾਨ ਲਿਆ ਗਿਆ ਜੋ ਕਿ ਨਵਾਂ ਢਾਂਚਾ ਉਸਾਰਨ ਦੇ ਨਾਲ-ਨਾਲ ਪੰਥ ਦੀ ਅੰਦੂਰਨੀ ਸਥਿਤੀ ਬਾਰੇ ਗੰਭੀਰਤਾ ਨਾਲ ਵਿਚਾਰ-ਵਟਾਂਦਰਾ ਕਰਨ ਲਈ ਸੱਦੀ ਗਈ ਸੀ।
ਪਾਰਟੀ ਦੇ ਬੁਲਾਰੇ ਕੰਵਰਪਾਲ ਸਿੰਘ ਨੇ ਦਸਿਆ ਕਿ ਪਾਰਟੀ ਦਾ ਨਵਾਂ ਢਾਂਚਾ ਜਥੇਬੰਦੀ ਦੀ ਸਥਾਪਨਾ ਦੀ ੩੭ਵੀਂ ਵਰੇਗੰਢ ਮੌਕੇ ੧੩ ਅਗਸਤ ਨੂੰ ਹੋਂਦ ਵਿੱਚ ਲਿਆਂਦਾ ਜਾਵੇਗਾ। ਉਹਨਾਂ ਦਸਿਆ ਕਿ ਮਾਲਵੇ ਖੇਤਰ ਵਿੱਚ ਉਹਨਾਂ ਦਾ ਜਥੇਬੰਦਕ ਆਧਾਰ ਨਾ-ਬਰਾਬਰ ਹੈ, ਇਸ ਲਈ ਉਸ ਖੇਤਰ ਵਿੱਚ ਨਵੇਂ ਮੈਂਬਰ ਲੈਣ ਲਈ ਵਿਸ਼ੇਸ਼ ਉਪਰਾਲੇ ਕੀਤੇ ਜਾਣਗੇ। ਉਹਨਾਂ ਦਸਿਆ ਕਿ ਨਵੇਂ ਢਾਂਚੇ ਬਾਰੇ ਅੰਤਿਮ ਫੈਸਲਾ ਪਾਰਟੀ ਮੁਖੀ ਹਰਚਰਨਜੀਤ ਸਿੰਘ ਧਾਮੀ ਦੇ ਅਮਰੀਕਾ ਤੋਂ ਵਾਪਿਸ ਆਉਣ ਉਪਰੰਤ ਲਿਆ ਜਾਵੇਗਾ। ਉਹਨਾਂ ਕਿਹਾ ਕਿ ਪੰਜਾਬ ਦੇ ਨਾਲ-ਨਾਲ ਇੰਗਲੈਂਡ, ਯੂਰਪ, ਅਮਰੀਕਾ ਅਤੇ ਕੈਨੇਡਾ ਵਿੱਚ ਵੀ ਨਵਾਂ ਜਥੇਬੰਦਕ ਢਾਂਚਾ ਸਿਰਜਿਆ ਜਾਵੇਗਾ।
ਉਹਨਾਂ ਕਿਹਾ ਕਿ ਜਥੇਬੰਦੀ ਦੀ ਨਵੀਂ ਦਿੱਖ ਸਿਰਜਣ ਲਈ ਮੀਟਿੰਗ ਵਿਚ ਫੈਸਲਾ ਕੀਤਾ ਗਿਆ ਕਿ ਜਥੇਬੰਦੀ ਵਿਚ ਨੌਜਵਾਨਾਂ ਦੀ ਸ਼ਮੂਲੀਅਤ ਨੂੰ ਤਰਜੀਹ ਦਿੱਤੀ ਜਾਵੇਗੀ ਅਤੇ ਹੇਠਲੇ ਪੱਧਰ ਤੱਕ ਜਥੇਬੰਦੀ ਦਾ ਵਿਸਤਾਰ ਕੀਤਾ ਜਾਵੇਗਾ। ਦਲ ਖ਼ਾਲਸਾ ਅੰਦਰ ਨਵੇਂ ਮੈਂਬਰ ਦੀ ਆਮਦ ਲਈ ਉਹਨਾਂ ਨੇ ਆਖਿਆ ਕਿ ਉਹਨਾਂ ਦਾ ਮੁਖ ਮਕਸਦ ਨੌਜਵਾਨਾਂ ਦੀ ਸਿਧਾਂਤਕ ਲੀਹਾਂ ਉਤੇ ਚਰਿੱਤਰ ਉਸਾਰੀ ਕਰਨਾ ਹੈ। ਉਹਨਾਂ ਜ਼ੋਰ ਦਿੰਦਿਆਂ ਕਿ ਕੌਮ ਦਾ ਭਵਿੱਖ ਨੌਜਵਾਨ ਸਿੱਖਾਂ ਦੇ ਹੱਥ ਵਿਚ ਹੈ ਅਤੇ ਉਹ ਜਥੇਬੰਦੀ ਦੇ ਪਲੇਟਫਾਰਮ ਰਾਹੀਂ ਨਵੇਂ ਚਿਹਰਿਆਂ ਅਤੇ ਯੋਗ ਨੌਜਵਾਨਾਂ ਨੂੰ ਅੱਗੇ ਲਿਆਉਣਗੇ।
ਦਲ ਖ਼ਾਲਸਾ ਆਗੂਆਂ ਨੇ ਪਾਰਟੀ ਏਜੰਡੇ ਦਾ ਖੁਲਾਸਾ ਕਰਦਿਆਂ ਕਿਹਾ ਕਿ ਸਿੱਖੀ ਦੀ ਪ੍ਰਫੁੱਲਤਾ ਲਈ ਪ੍ਰਭੂਸੱਤਾ ਸੰਪੰਨ ਸਿੱਖ ਰਾਜ ਦੀ ਸਿਰਜਣਾ, ਸਵੈ-ਨਿਰਣੇ ਦਾ ਹੱਕ ਹਾਸਿਲ ਕਰਨ ਲਈ ਜਦੋਜਹਿਦ ਜਾਰੀ ਰੱਖਣਾ, ਅਕਾਲ ਤਖਤ ਸਾਹਿਬ ਵਲੋਂ ਪ੍ਰਵਾਣਿਤ ਸਿੱਖ ਰਹਿਤ ਮਰਯਾਦਾ ਉਤੇ ਪਹਿਰਾ ਦੇਣਾ, ਮਨੁੱਖੀ ਅਧਿਕਾਰਾਂ ਦੇ ਘਾਣ ਵਿਰੁੱਧ ਆਵਾਜ਼ ਬੁਲੰਦ ਕਰਨਾ, ਪੰਜਾਬ ਦੀ ਨੌਜਵਾਨੀ ਨੂੰ ਨਸ਼ਿਆਂ ਦੇ ਕੋਹੜ ਤੋਂ ਬਚਾਉਣਾ ਅਤੇ ਸਿੱਖ ਰਾਜਨੀਤੀ ਅੰਦਰ ਆਏ ਗੰਦਲੇਪਣ ਵਿਰੁੱਧ ਜਾਗਰੂਕਤਾ ਲਿਆਉਣਾ ਹੈ।
ਕੌਮ ਅੰਦਰ ਅਹਿਮ ਤੇ ਸੰਵੇਦਣਸ਼ੀਲ ਮੁਦਿਆਂ ਉਤੇ ਇੱਕਸਾਰਤਾ ਤੇ ਇੱਕਸੁਰਤਾ ਦੀ ਘਾਟ ਮਹਿਸੂਸ ਕਰਦਿਆਂ ਡਾ ਮਨਜਿੰਦਰ ਸਿੰਘ ਕਿਹਾ ਕਿ ਕੌਮ ਦੀ ਆਜ਼ਾਦੀ ਦੀ ਲੜਾਈ ਲੜਣ ਵਾਲੀਆਂ ਧਿਰਾਂ ਅੰਦਰ ਏਕਤਾ ਜਰੂਰੀ ਹੈ ਪਰ ਇਸ ਤੋਂ ਵੀ ਜ਼ਰੂਰੀ ਹੈ ਕਿ ਇਹ ਏਕਤਾ ਸਿਧਾਂਤ ਅਤੇ ਆਜ਼ਾਦੀ ਦੇ ਏਜੰਡੇ ਉਤੇ ਹੋਵੇ ਅਤੇ ਮਿਸ਼ਨ ਨੂੰ ਅੱਗੇ ਤੋਰਨ ਲਈ ਹੋਵੇ ਨਾਂ ਕਿ ਆਉਂਦੀਆਂ ੨੦੧੭ ਦੀ ਵਿਧਾਨ ਸਭਾ ਚੋਣਾਂ ਨੂੰ ਮੁੱਖ ਰੱਖ ਕੇ ਕੀਤੀ ਜਾਵੇ। ਉਹਨਾਂ ਅਫਸੋਸ ਪ੍ਰਗਟਾਉਦਿਆਂ ਕਿਹਾ ਕਿ ਪੰਥਕ ਧਿਰਾਂ ਅੰਦਰ ਨਿਸ਼ਾਨੇ ਪ੍ਰਤੀ ਅਸਪਸ਼ਟਤਾ ਤੇ ਦੁਬਿਧਾ ਕਾਰਨ ਕੌਮ ਅੰਦਰ ਹਾਲਾਤ ਉਤਸ਼ਾਹਜਨਕ ਨਹੀਂ ਬਣ ਪਾ ਰਹੇ। ਮੀਟਿੰਗ ਵਿੱਚ ਬਾਪੂ ਸੂਰਤ ਸਿੰਘ ਖਾਲਸਾ ਵਲੋਂ ਨਜ਼ਰਬੰਦ ਸਿੰਘਾਂ ਦੀ ਰਿਹਾਈ ਲਈ ੧੬ ਜਨਵਰੀ ਤੋਂ ਆਰੰਭੇ ਸੰਘਰਸ਼ ਬਾਬਤ ਸਰਕਾਰਾਂ ਦੀ ਬਦਨੀਤੀ ਦੀ ਕਰੜੀ ਆਲੋਚਨਾ ਕੀਤੀ ਗਈ।
ਮੀਟਿੰਗ ਵਿੱਚ ਹੋਰਨਾਂ ਤੋਂ ਇਲਾਵਾ ਡਾ ਮਨਜਿੰਦਰ ਸਿੰਘ ਜੰਡੀ, ਸ. ਸਰਬਜੀਤ ਸਿੰਘ ਘੁਮਾਣ, ਰਣਬੀਰ ਸਿੰਘ, ਨੋਬਲਜੀਤ ਸਿੰਘ, ਯੂਥ ਆਗੂ ਪਰਮਜੀਤ ਸਿੰਘ ਟਾਂਡਾ, ਪ੍ਰਭਜੋਤ ਸਿੰਘ, ਮਨਜੀਤ ਸਿੰਘ, ਗੁਰਪ੍ਰੀਤ ਸਿੰਘ, ਗੁਰਮੀਤ ਸਿੰਘ, ਪਰਮਜੀਤ ਸਿੰਘ ਮੰਡ ਸ਼ਾਮਿਲ ਸਨ।
