ਸਿਰਸਾ (5 ਮਾਰਚ, 2015): ਸੌਦਾ ਡੇਰੇ ਦੀਆਂ ਸਾਧਵੀਆਂ ਨਾਲ ਬਲਾਤਕਾਰ ਕਰਨ, ਕਤਲਾਂ ਅਤੇ ਡੇਰੇ ਦੇ ਹੀ ਮਰਦ ਪੈਰੋਕਾਰਾਂ ਨੂੰ ਜਬਰਦਸਤੀ ਨਾਪੁੰਸਕ ਬਣਾਉਣ ਵਰਗੇ ਸੰਗੀਨ ਮਾਮਲਿਆਂ ਦਾ ਸੀਬੀਆਈ ਅਦਾਲਤ ਵਿੱਚ ਸਾਹਮਣਾ ਕਰ ਰਹੇ ਸੌਦਾ ਡੇਰਾ ਸਰਸਾ ਦੇ ਰਾਮ ਰਹੀਮ ਨੇ ਅੱਜ ਪੱਤਰਕਾਰ ਰਾਮਚੰਦਰ ਛਤਰਪਤੀ ਕਤਲ ਕਾਂਡ, ਸਾਧਵੀ ਜਬਰ ਜਨਾਹ ਅਤੇ ਰਣਜੀਤ ਕਤਲ ਕਾਂਡ ਮਾਮਲੇ ‘ਚ ਸੀ.ਬੀ.ਆਈ. ਕੋਰਟ ਵਿਚ ਵੀਡੀਓ ਕਾਨਫਰੰਸਿੰਗ ਰਾਹੀਂ ਪੇਸ਼ੀ ਭੁਗਤੀ।
ਸੌਦਾ ਸਾਧ ਅੱਜ ਸਵੇਰੇ ਸਿਰਸਾ ਦੀ ਅਦਾਲਤ ‘ਚ ਪੁੱਜਿਆ ਅਤੇ ਉਸਨੇ ਅਦਾਲਤ ‘ਚ ਬਣੇ ਵਿਸ਼ੇਸ਼ ਵੀਡਿਓ ਕਾਨਫਰੰਸਿੰਗ ਰੂਮ ‘ਚ ਜਾ ਕੇ ਪੇਸ਼ੀ ਭੁਗਤੀ। ਸ਼ੁਰੂਆਤ ਵਿੱਚ ਡੇਰਾ ਮੁਖੀ ਦੇ ਵਕੀਲਾਂ ਨੇ ਅਦਾਲਤ ਦੇ ਅੰਦਰ ਗਵਾਈਆਂ ਬੰਦ ਨਾ ਕਰਨ ਦੀ ਅਪੀਲ ਕੀਤੀ, ਜਿਸਦਾ ਸੀ.ਬੀ.ਆਈ. ਦੇ ਵਕੀਲਾਂ ਨੇ ਡਟ ਕੇ ਵਿਰੋਧ ਕੀਤਾ। ਇਸ ਅਪੀਲ ‘ਤੇ ਜੱਜ ਨੇ ਫੈਸਲਾ ਸੁਰੱਖਿਅਤ ਰੱਖ ਲਿਆ।
ਇਸ ਤੋਂ ਬਾਅਦ ਰਣਜੀਤ ਕਤਲ ਕਾਂਡ ਮਾਮਲੇ ‘ਚ ਡੇਰਾ ਮੁਖੀ ਦੇ ਵਕੀਲਾਂ ਨੇ 54 ਗਵਾਹਾਂ ਦੀ ਸੂਚੀ ਕੋਰਟ ਨੂੰ ਸੌਾਪੀ। ਇਸ ਤੋਂ ਬਾਅਦ ਪੱਤਰਕਾਰ ਰਾਮਚੰਦਰ ਛਤਰਪਤੀ ਕਤਲ ਕਾਂਡ ਮਾਮਲੇ ਦੀ ਸੁਣਵਾਈ ਹੋਈ।
21 ਮਾਰਚ ਨੂੰ ਡੇਰਾ ਮੁਖੀ ਧਾਰਾ 313 ਦੇ ਤਹਿਤ ਕੋਰਟ ਵਿੱਚ ਆਪਣੇ ਬਿਆਨ ਦਰਜ ਕਰਵਾਏਗਾ। ਤਿੰਨਾਂ ਮਾਮਲਿਆਂ ਦੀ ਸੁਣਵਾਈ ਤੋਂ ਬਾਅਦ ਹੁਣ 21 ਮਾਰਚ ਦੀ ਤਰੀਕ ਪੇਸ਼ੀ ਲਈ ਨਿਰਧਾਰਿਤ ਕੀਤੀ ਗਈ ਹੈ।
