ਮਿਊਨਿਖ: ਜਰਮਨੀ ਦੇ ਦੱਖਣੀ ਸ਼ਹਿਰ ਮਿਊਨਿਖ ਦੇ ਓਲੰਪਿਆ ਸ਼ਾਪਿੰਗ ਮਾਲ ’ਚ ਤਿੰਨ ਬੰਦੂਕਧਾਰੀਆਂ ਵੱਲੋਂ ਕੀਤੀ ਗਈ ਅੰਨ੍ਹੇਵਾਹ ਗੋਲੀਬਾਰੀ ਦੌਰਾਨ ਕਈ ਵਿਅਕਤੀ ਮਾਰੇ ਗਏ ਹਨ। ਅਪੁਸ਼ਟ ਰਿਪੋਰਟਾਂ ਮੁਤਾਬਕ ਮ੍ਰਿਤਕਾਂ ਦੀ ਗਿਣਤੀ 10 ਤੋਂ ਵੱਧ ਹੈ। ਮਿਊਨਿਖ ਪੁਲੀਸ ਦੀ ਤਰਜਮਾਨ ਨੇ ਦੱਸਿਆ ਕਿ ਕਈ ਵਿਅਕਤੀ ਹਲਾਕ ਹੋਏ ਹਨ ਜਾਂ ਜ਼ਖ਼ਮੀ ਹੋਏ ਹਨ। ਹਮਲਾ ਤਿੰਨ ਬੰਦੂਕਧਾਰੀ ਵੱਲੋਂ ਕੀਤਾ ਗਿਆ। ਇਸੇ ਦੌਰਾਨ ਇਕ ਹੋਰ ਸਿਟੀ ਸੈਂਟਰ ਵਿੱਚ ਅਜਿਹੇ ਹਮਲੇ ਦੀਆਂ ਖ਼ਬਰਾਂ ਹਨ। ਪੁਲੀਸ ਨੇ ਲੋਕਾਂ ਨੂੰ ਘਰੋਂ ਬਾਹਰ ਨਾ ਨਿਕਲਣ ਦੀ ਤਾਕੀਦ ਕੀਤੀ ਹੈ।
ਆਖਰੀ ਖ਼ਬਰਾਂ ਮਿਲਣ ਤਕ ਮੌਲ ਦੀ ਘੇਰਾਬੰਦੀ ਕਰ ਕੇ ਸੁਰੱਖਿਆ ਬਲਾਂ ਵੱਲੋਂ ਕਾਰਵਾਈ ਕੀਤੀ ਜਾ ਰਹੀ ਸੀ। ਸ਼ਾਪਿੰਗ ਮੌਲ ਮਿਊਨਿਖ ਓਲੰਪਿਕ ਸਟੇਡੀਅਮ ਦੇ ਨਾਲ ਪੈਂਦਾ ਹੈ ਜਿਥੇ ਫਲਸਤੀਨੀ ਦਹਿਸ਼ਤੀ ਗੁੱਟ ਬਲੈਕ ਸਤੰਬਰ ਨੇ 1972 ਦੀਆਂ ਓਲੰਪਿਕ ਖੇਡਾਂ ਦੌਰਾਨ 11 ਇਜ਼ਰਾਇਲੀ ਐਥਲੀਟਾਂ ਨੂੰ ਬੰਦੀ ਬਣਾ ਕੇ ਮਾਰ ਮੁਕਾਇਆ ਸੀ। ਕਰੀਬ ਇਕ ਹਫ਼ਤਾ ਪਹਿਲਾਂ 17 ਵਰ੍ਹਿਆਂ ਦੇ ਪਨਾਹਗੀਰ ਅਲ੍ਹੜ ਨੇ ਰੇਲਗੱਡੀ ’ਚ ਕੁਹਾੜੇ ਨਾਲ ਹਾਂਗ ਕਾਂਗ ਦੇ ਚਾਰ ਅਤੇ ਇਕ ਸਥਾਨਕ ਵਿਅਕਤੀ ਨੂੰ ਜ਼ਖ਼ਮੀ ਕਰ ਦਿੱਤਾ ਸੀ।
ਰਾਇਟਰਜ਼
