ਰੂਪਨਗਰ (3 ਸਤੰਬਰ ,2015): ਜਿਲਾ ਪੁਲਿਸ ਨੇ ਬਿਹਾਰ ‘ਚ ਸਰਗਰਮ ਮਾਓਵਾਦੀ ਧੜੇ ਦੇ 2 ਕਾਰਕੁਨਾਂ ਨੂੰ ਗ੍ਰਿਫਤਾਰ ਕਰਕੇ ਉਨ੍ਹਾਂ ਕੋਲੋ ਅਸਲਾ ਬਰਾਮਦ ਕਰਨ ਦਾ ਦਾਅਵਾ ਕੀਤਾ ਹੈ। ਪੁਲਿਸ ਅਨੁਸਾਰ ਇਹ ਦੋਵੇਂ ਮੁਲਜ਼ਮ ਬਿਹਾਰ ਪੁਲਿਸ ਨੂੰ ਲੋੜੀਂਦੇ ਸਨ ਜਿਨ੍ਹਾਂ ‘ਤੇ ਕਤਲ ਅਤੇ ਗੱਡੀਆਂ ਦੀ ਸਾੜ-ਫੂਕ ਦੇ ਸੰਗੀਨ ਮੁਕੱਦਮੇ ਦਰਜ ਹਨ ਅਤੇ ਇਹ ਰੂਪਨਗਰ ਦੇ ਇਕ ਢਾਬੇ ‘ਤੇ ਲੁੱਕ ਕੇ ਰਹਿ ਰਹੇ ਸਨ।
ਅੱਜ ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਜ਼ਿਲ੍ਹਾ ਪੁਲਿਸ ਮੁਖੀ ਵਰਿੰਦਰਪਾਲ ਸਿੰਘ ਵੱਲੋਂ ਦੱਸੀ ਕਹਾਣੀ ਅਨਸਾਰ ਬੀਤੇ ਦਿਨ ਇੰਸਪੈਕਟਰ ਗੱਬਰ ਸਿੰਘ ਇੰਚਾਰਜ ਸੀ. ਆਈ. ਏ. ਰੂਪਨਗਰ ਪੁਲਿਸ ਪਾਰਟੀ ਸਮੇਤ ਸਰਹਿੰਦ ਨਹਿਰ ਪੁਲ ‘ਤੇ ਨਾਕਾਬੰਦੀ ਦੌਰਾਨ ਤਲਾਸ਼ੀ ਲੈ ਰਹੇ ਸਨ, ਇਸੇ ਦੌਰਾਨ ਸ਼ੱਕ ਪੈਣ ‘ਤੇ ਮਦੀਪ ਯਾਦਵ ਉਰਫ਼ ਮਟਲੂ ਅਤੇ ਸਨੋਜ ਯਾਦਵ ਉਰਫ਼ ਭਿਖਾਰੀ ਯਾਦਵ ਜੋ ਗਇਆ (ਬਿਹਾਰ) ਦੇ ਰਹਿਣ ਵਾਲੇ ਹਨ ਅਤੇ ਬਿਹਾਰ, ਝਾਰਖੰਡ, ਸਪੈਸ਼ਲ ਏਰੀਆ ਕਮੇਟੀ (ਬੀ. ਜੇ. ਐਸ. ਏ. ਸੀ.) ਸੀ.ਪੀ.ਆਈ. ਮਾਊਵਾਦ ਨਾਲ ਸਬੰਧਤ ਹਨ, ਨੂੰ ਕਾਬੂ ਕੀਤਾ ਗਿਆ।
ਇਨ੍ਹਾਂ ਕੋਲੋਂ ਇਕ ਦੇਸੀ ਪਿਸਤੌਲ, ਦੋ ਜਿੰਦਾ ਕਾਰਤੂਸ ਤੇ ਇਕ ਕਮਾਨੀਦਾਰ ਚਾਕੂ ਬਰਾਮਦ ਕੀਤਾ ਗਿਆ।
ਜ਼ਿਲ੍ਹਾ ਪੁਲਿਸ ਮੁਖੀ ਦੱਸਣ ਮੁਤਾਬਿਕ ਮਦੀਪ ਯਾਦਵ ਜ਼ੋਨਲ ਕਮਾਂਡਰ ਹੈ ਜਦੋਂ ਕਿ ਮਨੋਜ ਯਾਦਵ ਏਰੀਆ ਕਮਾਂਡਰ ਹੈ।ਇਨ੍ਹਾਂ ਦੀ ਸਾਲ 2014 ‘ਚ ਬਿਸਰਾਪੁਰ ਜ਼ਿਲ੍ਹਾ ਮਾਲਾਮੂ ਵਿਚ ਟੀ.ਪੀ.ਸੀ. ਦੇ 15 ਕਾਰਕੁਨਾਂ ਨੂੰ ਕਤਲ ਕਰਨ ਤੇ ਸਾਲ 2015 ‘ਚ ਮਦਨਪੁਰ ਜ਼ਿਲ੍ਹਾ ਔਰੰਗਾਬਾਦ (ਬਿਹਾਰ) ‘ਚ 35 ਗੱਡੀਆਂ ਜਲਾਉਣ ‘ਚ ਸ਼ਮੂਲੀਅਤ ਹੈ।
