ਅੰਮ੍ਰਿਤਸਰ: ਵ੍ਰਿੰਦਾਵਨ ਦੇ ਧਰਮ ਪ੍ਰਚਾਰਕ ਡਾ: ਸਵਾਮੀ ਅਵਸ਼ੇਸ਼ਾਨੰਦ ਵਲੋਂ ਸੁਪਰੀਮ ਕੋਰਟ ਦੇ ਮੁੱਖ ਜੱਜ ਜਗਦੀਸ਼ ਸਿੰਘ ਖੇਹਰ ਦੀ ਇਹ ਕਹਿ ਕੇ ਤਰੀਫ ਕੀਤੀ ਗਈ ਹੈ ਕਿ ਸਿੱਖ ਜੱਜ ਨੇ ਆਪਣੇ ਆਪ ਨੂੰ ਹਿੰਦੂ ਕਿਹਾ ਹੈ। ਜਦ ਕਿ ਇਸ ਘਟਨਾਕ੍ਰਮ ਪਿੱਛੇ ਫਿਰਕਾਪ੍ਰਸਤੀ ਦਾ ਹਥਿਆਰ ਚੱਲਦਾ ਨਜ਼ਰੀਂ ਪੈਂਦਾ ਹੈ ਅਤੇ ਇਹ ਸ਼ਬਦ ਕੋਝੀ ਚਾਲੇ ਉਹਨਾਂ ਦੇ ਮੂੰਹ ਵਿਚ ਪਾਏ ਜਾ ਰਹੇ ਹਨ।
ਇਸ ਸੌੜੀ ਸਿਆਸਤ ਦੀ ਨਿਖੇਧੀ ਕਰਦਿਆਂ ਪੰਥਕ ਤਾਲਮੇਲ ਸੰਗਠਨ ਦੇ ਕਨਵੀਨਰ ਗਿਆਨੀ ਕੇਵਲ ਸਿੰਘ ਸਾਬਕਾ ਜਥੇਦਾਰ ਤਖਤ ਸ੍ਰੀ ਦਮਦਮਾ ਸਾਹਿਬ ਅਤੇ ਸੰਗਠਨ ਕੋਰ ਕਮੇਟੀ ਨੇ ਕਿਹਾ ਕਿ ਸਿੱਖ ਪੰਥ ਨੂੰ ਕੋਈ ਦੁਨਿਆਵੀ ਮਨੁੱਖ ਪ੍ਰਮਾਣ–ਪੱਤਰ ਨਹੀਂ ਦੇ ਸਕਦਾ ਕਿ ਉਹ ਕਿਸ ਦਾ ਅੰਗ ਹੈ ਅਤੇ ਕਿਸ ਦਾ ਨਹੀਂ ਹੈ। ਸਿੱਖ ਧਰਮ ਦੇ ਪ੍ਰਸੰਗ ਵਿਚ ਪੰਥ ਦਾ ਅਰਥ ਨਿਰਮਲ-ਪੰਥ ਤੋਂ ਹੈ ਜਿਸ ਦੇ ਮੋਢੀ ਗੁਰੂ ਨਾਨਕ ਸਾਹਿਬ ਜੀ ਹਨ। ਇਹ ਪੰਥ ਇਨਕਲਾਬੀ ਬੋਲ, ਬਲ ਅਤੇ ਕੁਰਬਾਨੀ ਦੇ ਮਜੱਸਮੇ ਦਾ ਵਾਰਸ ਹੈ। ਸਿੱਖ ਕੌਮ ਹੋਰ ਕੌਮਾਂ ਦੀ ਤਰ੍ਹਾਂ ਵੱਖਰੀ ਕੌਮ ਹੈ ਅਤੇ ਇਸ ਦੀ ਵਿਲੱਖਣਤਾ ਹੈ ਕਿ ਨਾ ਤਾਂ ਕਿਸੇ ਤੋਂ ਡਰਦੀ ਹੈ ਤੇ ਨਾ ਹੀ ਕਿਸੇ ਨੂੰ ਡਰਾਉਂਦੀ ਹੈ। ਬਲਕਿ ਸਰਬੱਤ ਦਾ ਭਲਾ ਮੰਗਦੀ ਹੈ। ਇਸ ਦੇ ਬਾਵਜੂਦ ਤੱਤ ਵਿੱਦਿਆ ਤੇ ਵਿਚਾਰ ਤੋਂ ਵਾਂਝੇ ਲੋਕ ਧਰਮ ਅਤੇ ਨੀਤੀ ਆਦਿਕ ਮਾਮਲਿਆਂ ਦੀ ਖਿਚੜੀ ਬਣਾ ਕੇ ਪਰਸਪਰ ਈਰਖਾ ਦਵੈਤ ਨਾਲ ਸੜਦੇ ਹਨ ਤੇ ਲੋਕਾਂ ਨੂੰ ਲੜਾਉਣ ਦਾ ਪਾਪ ਕਮਾਉਂਦੇ ਹਨ ਅਤੇ ਪ੍ਰਤਾਪੀ ਕੌਮਾਂ ਦੇ ਪਿਆਰ ਤੋਂ ਸੱਖਣੇ ਰਹਿ ਜਾਂਦੇ ਹਨ।
ਮੁੱਖ ਜੱਜ ਦੇ ਮੂੰਹ ਵਿਚੋਂ ਕਢਵਾਏ ਜਾ ਰਹੇ ਸ਼ਬਦਾਂ ਤੋਂ ਵੀ ਜ਼ਾਹਰ ਹੁੰਦਾ ਹੈ ਕਿ ਬਹੁਗਿਣਤੀ ਵਿਚ ਬੈਠੇ ਮੁਤੱਸਬੀ ਲੋਕਾਂ ਨੂੰ ਇਕ ਸਿੱਖ ਕੋਲ ਸੰਵਿਧਾਨਿਕ ਤੇ ਹੱਕੀ ਅਹੁਦਾ ਸਹਿਣ ਨਹੀਂ ਹੋ ਰਿਹਾ ਹੈ। ਜਿਸ ਲਈ ਸਿੱਖ ਕੌਮ ਦੇ ਮੁਕੰਮਲ ਅਜ਼ਾਦ ਦਰਜੇ ਵਿਰੁੱਧ ਤੀਰ ਛੱਡੇ ਜਾ ਰਹੇ ਹਨ। ਡਾ: ਅਵਸ਼ੇਸ਼ਾਨੰਦ ਨੂੰ ਇਹ ਵੀ ਯਾਦ ਰੱਖਣਾ ਚਾਹੀਦਾ ਹੈ ਕਿ 1980– 1990 ਦੇ ਦਹਾਕੇ ਵਿਚ ਹਥਿਆਰਬੰਦ ਸੰਘਰਸ਼ ਸਿੱਖ ਪੰਥ ਦੀ ਕਿਸੇ ਗਲਤੀ ਕਾਰਣ ਨਹੀਂ ਪੈਦਾ ਹੋਇਆ ਸੀ ਬਲਕਿ ਪੂਰੇ ਪੰਜਾਬ ਦੀਆਂ ਹੱਕੀ ਮੰਗਾਂ ਅਤੇ ਸੱਚ ਦੀ ਅਵਾਜ਼ ਨੂੰ ਕੁਚਲਣ ਲਈ ਪੈਦਾ ਕੀਤਾ ਗਿਆ ਸੀ। ਉਹ ਮੰਗਾਂ ਅੱਜ ਵੀ ਉਸੇ ਤਰ੍ਹਾਂ ਹੀ ਖੜ੍ਹੀਆਂ ਹਨ ਅਤੇ ਸਿੱਖਾਂ ਤੇ ਪੰਜਾਬੀਆਂ ਨੂੰ ਬੇਗਾਨੇਪਨ ਦਾ ਅਹਿਸਾਸ ਕਰਵਾ ਰਹੀਆਂ ਹਨ। ਇਹ ਸੁਝਾਅ ਸਿਰੇ ਤੋਂ ਅਰਥਹੀਣ ਹੈ ਕਿ ਜੇਕਰ ਸਿੱਖ ਪੰਥ ਨੇ ਆਪਣੇ ਆਪ ਨੂੰ ਹਿੰਦੂ ਧਰਮ ਦਾ ਅੰਗ ਮੰਨ ਲਿਆ ਹੁੰਦਾ ਤਾਂ ਪੰਜਾਬ ਨੂੰ ਸੰਤਾਪ ਭੋਗਣਾ ਹੀ ਨਹੀਂ ਪੈਣਾ ਸੀ।
