ਚੰਡੀਗੜ੍ਹ: ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਦਰਬਾਰ ਸਾਹਿਬ ਵਿਖੇ ਇੱਕ ਅਰਦਾਸੀਆ ਸਿੰਘ ਵਲੋਂ ਸਿਰੋਪਾਓ ਬਖ਼ਸ਼ਿਸ਼ ਕਰਨ ਤੋਂ ਇਨਕਾਰ ਕੀਤੇ ਜਾਣ ਦੇ ਇੱਕ ਦਿਨ ਪਿੱਛੋਂ ‘ਆਮ ਆਦਮੀ ਪਾਰਟੀ’ (ਆਪ) ਨੇ ਇਸ ਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਵਾਰ-ਵਾਰ ਬੇਅਦਬੀ ਹੋਣ ਕਾਰਣ ਸਮੂਹ ਸਿੱਖ ਕੌਮ ਦੀਆਂ ਭਾਵਨਾਵਾਂ ਦੀ ਪ੍ਰਤੀਕ੍ਰਿਆ ਕਰਾਰ ਦਿੱਤਾ।
ਆਮ ਆਦਮੀ ਪਾਰਟੀ ਦੇ ਬੁਲਾਰੇ ਸੁਖਪਾਲ ਖੈਰਾ ਨੇ ਕਿਹਾ,’ਸਿਰੋਪਾਓ ਬਖ਼ਸ਼ਿਸ਼ ਨਾ ਕਰ ਕੇ ‘ਅਰਦਾਸੀਆ ਭਾਈ ਬਲਬੀਰ ਸਿੰਘ ਸਮੁੱਚੀ ਸਿੱਖ ਕੌਮ ਦੇ ਬਾਦਲਾਂ ਪ੍ਰਤੀ ਰੋਹ ਨੂੰ ਹੀ ਪ੍ਰਗਟਾ ਰਹੇ ਸਨ ਕਿਉਂਕਿ ਬਾਦਲ ਹਾਲੇ ਤੱਕ ਬੇਅਦਬੀ ਦੇ ਇਸ ਸ਼ਰਮਨਾਕ ਅਪਰਾਧ ਕਰਨ ਵਾਲੇ ਇੱਕ ਵੀ ਦੋਸ਼ੀ ਨੂੰ ਗ੍ਰਿਫ਼ਤਾਰ ਕਰਨ ਤੋਂ ਨਾਕਾਮ ਰਹੇ ਹਨ।”
ਖਹਿਰਾ ਨੇ ਇਹ ਵੀ ਕਿਹਾ,”ਭਾਵੇਂ ਇਸ ਤੱਥ ਤੋਂ ਸਾਰੇ ਭਲੀਭਾਂਤ ਜਾਣੂ ਹਨ ਕਿ ਐਸ.ਜੀ.ਪੀ.ਸੀ. ਪ੍ਰਧਾਨ ਮੱਕੜ ਪੂਰੀ ਤਰ੍ਹਾਂ ਬਾਦਲਾਂ ਦੀ ‘ਕਠਪੁਤਲੀ’ ਹੈ ਪਰ ਭਾਈ ਬਲਬੀਰ ਸਿੰਘ ਵਿਰੁੱਧ ਉਨ੍ਹਾਂ ਦੀ ਕਾਰਵਾਈ ਨੇ ਇੱਕ ਵਾਰ ਫਿਰ ਦਰਸਾ ਦਿੱਤਾ ਹੈ ਕਿ ਮੱਕੜ ਆਪਣੇ ‘ਸਿਆਸੀ ਪ੍ਰਭੂਆਂ’ ਪ੍ਰਤੀ ਕਿੰਨੇ ਵਫ਼ਾਦਾਰ ਹਨ।”
ਖਹਿਰਾ ਨੇ ਕਿਹਾ ਕਿ ਬਰਗਾੜੀ ‘ਚ ਬੇਅਦਬੀ ਦੀ ਘਟਨਾ ਦੀ ਜਾਂਚ ਲਈ ਬਾਦਲ ਨੇ ਇੱਕ ਵਿਸ਼ੇਸ਼ ਜਾਂਚ ਟੀਮ (ਐਸ.ਆਈ.ਟੀ.) ਅਤੇ ਇੱਕ ਕਮਿਸ਼ਨ ਤੱਕ ਕਾਇਮ ਕੀਤੇ ਸਨ ਪਰ ਹਾਲੇ ਤੱਕ ਉਨ੍ਹਾਂ ਦਾ ਕੋਈ ਨਤੀਜਾ ਸਾਹਮਣੇ ਨਹੀਂ ਆ ਸਕਿਆ। ਇੱਥੋਂ ਤੱਕ ਬੇਅਦਬੀ ਦੀਆਂ ਘਟਨਾਵਾਂ ਦੀ ਜਾਂਚ ਵਿੱਚ ਤਾਂ ਸੀ.ਬੀ.ਆਈ. ਵੀ ਬੁਰੀ ਤਰ੍ਹਾਂ ਨਾਕਾਮ ਰਹੀ ਹੈ।
ਖਹਿਰਾ ਨੇ ਕਿਹਾ,”ਘਟਨਾ ਦੀ ਜਾਂਚ ਕਰਨ ਦੀ ਥਾਂ, ਸੀ.ਬੀ.ਆਈ. ਨੇ ਕੇਵਲ ਬੇਅਦਬੀ ਲਈ ਦੋਸ਼ੀ ਦੀ ਇਤਲਾਹ ਦੇਣ ਵਾਲੇ ਲਈ ਨਕਦ ਇਨਾਮ ਦੇਣ ਦਾ ਐਲਾਨ ਕੀਤਾ।”
ਪੰਜਾਬ ਵਿੱਚ ਕਾਨੂੰਨ ਤੇ ਵਿਵਸਥਾ ਦੀ ਹਾਲਤ ਬਾਰੇ ਬੋਲਦਿਆਂ ਖਹਿਰਾ ਨੇ ਕਿਹਾ ਕਿ ਪੰਜਾਬ ਵਿੱਚ ਘਿਨਾਉਣੇ ਜੁਰਮਾਂ ਦੀ ਗਿਣਤੀ ਤੇਜ਼ੀ ਨਾਲ ਵਧਦੀ ਜਾ ਰਹੀ ਹੈ, ਜਿਵੇਂ ਹਾਲੇ ਬੀਤੇ ਦਿਨੀਂ ਜਲੰਧਰ ‘ਚ ਦਿਨ ਦਿਹਾੜੇ ਇੱਕ ਉਦਯੋਗਪਤੀ ਦਾ ਕਤਲ ਹੋਇਆ, ਪਰ ਬਾਦਲਾਂ ਨੇ ਤਾਂ ਸੱਚਾਈ ਤੋਂ ਆਪਣੇ ਮੂੰਹ ਮੋੜੇ ਹੋਏ ਹਨ ਤੇ ਉਹ ਸੂਬੇ ਵਿੱਚ ਮੁਕੰਮਲ ਸ਼ਾਂਤੀ ਦੇ ਦਾਅਵੇ ਕਰ ਰਹੇ ਹਨ।
ਖਹਿਰਾ ਨੇ ਦੋਸ਼ ਲਾਇਆ ਕਿ ਭਾਈ ਰਣਜੀਤ ਸਿੰਘ ਢੱਡਰੀਆਂਵਾਲਿਆਂ ਉਤੇ ਹਮਲੇ ‘ਚ ਸ਼ਾਮਲ ਦੋਸ਼ੀਆਂ ਵਿਰੁੱਧ ਕੋਈ ਕਾਰਵਾਈ ਕਰਨ ਦੀ ਥਾਂ ਅਕਾਲੀ ਹੁਣ ਪੀੜਤਾਂ ਅਤੇ ਹਮਲਾਵਰਾਂ ਵਿਚਾਲੇ ਸੌਦੇਬਾਜ਼ੀਆਂ ਰਾਹੀਂ ਕੋਈ ਸਮਝੌਤਾ ਕਰਵਾਉਣ ਦੇ ਸਿਰਤੋੜ ਯਤਨ ਕਰ ਰਹੇ ਹਨ।
