ਚੰਡੀਗੜ੍ਹ: ਬਲਾਤਕਾਰ ਮਾਮਲੇ ‘ਚ ਡੇਰਾ ਸਿਰਸਾ ਮੁਖੀ ਰਾਮ ਰਹੀਮ ਨੂੰ ਦੋਸ਼ੀ ਠਹਿਰਾਏ ਜਾਣ ਤੋਂ ਬਾਅਦ ਸ਼ਨੀਵਾਰ ਨੂੰ ਪੁਲਿਸ ਅਤੇ ਭਾਰਤੀ ਫੌਜ ਨੇ ਡੇਰਾ ਸਿਰਸਾ ਦੇ ਬਾਹਰ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਸਿਰਸਾ ਸਥਿਤ ਡੇਰਾ ਸੌਦਾ ਦੇ ਹੈਡ ਕੁਆਟਰ ‘ਚ ਹਜ਼ਾਰਾਂ ਦੀ ਤਾਦਾਦ ‘ਚ ਡੇਰੇ ਦੇ ਹਮਾਇਤੀ ਮੌਜੂਦ ਹਨ। ਇਨ੍ਹਾਂ ਹਮਾਇਤੀਆਂ ਨੂੰ ਸਵੇਰੇ ਪੁਲਿਸ ਨੇ ਡੇਰੇ ਤੋਂ ਬਾਹਰ ਕੱਢਿਆ ਸੀ ਜਿਨ੍ਹਾਂ ਵਿਚੋਂ ਕਈਆਂ ਕੋਲੋਂ ਤਲਵਾਰਾਂ, ਪੈਟਰੋਲ ਦੀਆਂ ਬੋਤਲਾਂ ਆਦਿ ਬਰਾਮਦ ਹੋਏ ਹਨ।
ਇਸ ਘਟਨਾ ਤੋਂ ਬਾਅਦ ਡੇਰਾ ਸਿਰਸਾ ਤੋਂ ਬਾਹਰ ਰਾਮ ਰਹੀਮ ਦੇ ਚੇਲਿਆਂ ਨੂੰ ਕੱਢਣ ਲਈ ਪੁਲਿਸ, ਫੌਜ ਅਤੇ ਰੈਪਿਡ ਐਕਸ਼ਨ ਫੋਰਸ ਦੀਆਂ ਟੀਮਾਂ ਪਹੁੰਚ ਗਈਆਂ ਹਨ।
ਸਿਰਸਾ ਦੇ ਡਿਪਟੀ ਕਮਿਸ਼ਨਰ ਪ੍ਰਭਜੋਤ ਸਿੰਘ ਦੇ ਪੀ.ਏ. ਪੁਰਸ਼ੋਤਮ ਨੇ ਮੀਡੀਆ ਨੂੰ ਦੱਸਿਆ ਕਿ ਪੁਲਿਸ, ਫੌਜ ਅਤੇ ਰੈਪਿਡ ਐਕਸ਼ਨ ਫੋਰਸ ਦੇ ਮੁਲਾਜ਼ਮਾਂ ਨੇ ਡੇਰਾ ਸਿਰਸਾ ਦੇ ਬਾਹਰ ਮੋਰਚਾ ਸੰਭਾਲ ਲਿਆ ਹੈ।
ਡੇਰੇ ਦੇ ਅੰਦਰ ਸਥਾਈ ਤੌਰ ‘ਤੇ 4-5 ਹਜ਼ਾਰ ਲੋਕ ਕਹਿੰਦੇ ਹਨ ਜਿਸ ਨੂੰ ਹਟਾਉਣ ਦੀ ਕੋਸ਼ਿਸ਼ ਕੀਤੀ ਜਾਏਗੀ।
ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਡੇਰਾ ਸੈਂਕੜੇ ਏਕੜਾਂ ‘ਚ ਫੈਲਿਆ ਹੋਇਆ ਹੈ ਜਿਸਨੂੰ ਖਾਲੀ ਖਰਾਉਣ ‘ਚ ਕਾਫੀ ਸਮਾਂ ਲੱਗ ਸਕਦਾ ਹੈ। ਇਸ ਦੌਰਾਨ ਹਿੰਸਾ ਹੋਣ ਦਾ ਵੀ ਖਦਸ਼ਾ ਹੈ।
ਦੂਜੇ ਪਾਸੇ ਮੁੱਖ ਡੇਰੇ ‘ਚ ਰਹਿਣ ਵਾਲੇ ਇਕ ਸ਼ਖਸ ਨੇ ਦੱਸਿਆ ਕਿ ਫੌਜ ਅਤੇ ਪੁਲਿਸ ਸਿਰਫ ਫਲੈਗ ਮਾਰਚ ਕਰ ਰਹੀ ਹੈ ਉਹ ਮੁੱਖ ਡੇਰਾ ਖਾਲੀ ਨਹੀਂ ਕਰਾ ਰਹੀ।
ਜਦੋਂ ਮੀਡੀਆ ਨੇ ਡੇਰਾ ਖਾਲੀ ਕਰਾਉਣ ਬਾਰੇ ਪੁੱਛਿਆ ਕਿ ਇੱਥੇ ਪੱਕੇ ਤੌਰ ‘ਤੇ ਰਹਿਣ ਵਾਲੇ ਕਿੱਥੇ ਜਾਣਗੇ ਤਾਂ ਡੇਰਾ ਪ੍ਰਸ਼ਾਸਨ ਦੇ ਖਾਸ ਬੰਦੇ ਨੇ ਦੱਸਿਆ ਕਿ ਜੇ ਫੌਜ/ ਪੁਲਿਸ ਡੇਰਾ ਖਾਲੀ ਕਰਾਏਗੀ ਤਾਂ ਅਸੀਂ ਡੇਰਾ ਖਾਲੀ ਕਰ ਦਿਆਂਗੇ ਪਰ ਪੱਕੇ ਤੌਰ ‘ਤੇ ਰਹਿਣ ਵਾਲੇ “ਸਾਧੂ” ਕਿੱਥੇ ਜਾਣਗੇ।
ਤਲਾਸ਼ੀ ਲੈਣ ਦੇ ਸਵਾਲ ‘ਤੇ ਉਸਨੇ ਕਿਹਾ ਕਿ ਪ੍ਰਸ਼ਾਸਨ ਚਾਹੇ ਤਾਂ ਤਲਾਸ਼ੀ ਲੈ ਲਵੇ ਕਿਉਂਕਿ ਉਹ “ਧਰਮ” ਦਾ ਕੰਮ ਕਰਦੇ ਹਨ ਉਨ੍ਹਾਂ ਕੋਲ ਕੋਈ ਮਾਰੂ ਹਥਿਆਰ ਨਹੀਂ ਹਨ।
