ਲੁਧਿਆਣਾ (11 ਅਪ੍ਰੈਲ 2015): ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਭਾਰਤ ਦੀ ਭਾਜਪਾ ਸਰਕਾਰ ਵੱਲੋੰਂ ਪਿੱਛਲੇ ਦਿਨੀ ਕਿਸਾਨ ਮਾਰੂ “ਜ਼ਮੀਨ ਪ੍ਰਾਪਤੀ ਬਿੱਲ” ਦੇ ਖਿਲਾਫ ਲੁਧਿਆਣਾ ਦੇ ਡਿਪਟੀ ਕਮਿਸ਼ਨਰ ਦੇ ਦਫਤਰ ਬਾਹਰ ਫਤਿਹਗੜ੍ਹ ਸਾਹਿਬ ਦੇ ਆਮ ਆਦਮੀ ਪਾਰਟੀ ਦੇ ਐੱਮ.ਪੀ. ਸ. ਹਰਿੰਦਰ ਸਿੰਘ ਖਾਲਸਾ ਦੀ ਅਗਵਾਈ ਵਿੱਚ ਮੁਜ਼ਾਹਰਾ ਕਤਿਾ ਗਿਆ। ਸ੍ਰ. ਖਾਲਸਾ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਐੱਨ.ਡੀ.ਏ. ਦੁਆਰਾ ਪਾਸ ਕੀਤਾ ਬਿੱਲ “ਜ਼ਮੀਨ ਪ੍ਰਾਪਤੀ ਬਿੱਲ” ਦਾ ਪੁਰਜ਼ੋਰ ਵਿਰੋਧ ਕਰਦੀ ਹੈ।
ਸ. ਖਾਲਸਾ ਨੇ ਕਿਹਾ ਕਿ ਕਾਂਗਰਸ ਦੀ ਅਗਵਾਈ ਵਿੱਚ ਯੂ.ਪੀ.ਏ. ਵਾਲਾ ਪਿਛਲਾ ਬਿਲ ਵੀ ਕਿਸਾਨ ਵਿਰੋਧੀ ਸੀ ਪਰ ਐੱਨ.ਡੀ.ਏ. ਦੁਆਰਾ ਲਿਆਂਦਾ ਬਿੱਲ ਲੱਖਾਂ ਕਿਸਾਨਾਂ ਅਤੇ ਕਿਸਾਨੀ ਦਾ ਕੰਮ ਕਰਨ ਵਾਲੇ ਮਜ਼ਦੂਰਾਂ ਨਾਲ ਇਹ ਸ਼ਰੇਆਮ ਧੱਕਾ ਹੈ। ਕਿਸਾਨਾਂ ਦੀ ਲੁੱਟ ਕਰਨ ਲਈ ਬੀ.ਜੇ.ਪੀ ਸਰਕਾਰ ਨੇ ਇਹ ਸਖਤ ਬਿੱਲ ਲਿਆ ਕੇ ਉਸਨੂੰ ਹੋਰ ਖਰਾਬ ਕਰ ਦਿੱਤਾ।
ਲੋਕ ਸਭਾ ਚੋਣਾਂ ਦੇ ਦੌਰਾਨ ਅਕਾਲੀ ਭਾਜਪਾ ਗਠਜੋੜ ਨੇ ਵਾਅਦਾ ਕੀਤਾ ਸੀ ਕਿ ਇਹ ਕਿਸਾਨਾਂ ਦੇ ਅਧਿਕਾਰਾਂ ਦੀ ਰੱਖਿਆ ਕਰਨਗੇ ਪਰ ਸੱਤਾ ਵਿੱਚ ਆਉਣ ਦੇ ਬਾਅਦ ਹੀ ਆਪਣਾ ਅਸਲ ਰੰਗ ਦਿਖਾਉਂਦੇ ਹੋਏ ਕਾਰਪੋਰੇਟ ਪਰਿਵਾਰਾਂ ਦੇ ਅੱਗੇ ਗੋਡੇ ਟੇਕ ਦਿੱਤੇ।
ਇਹ ਬਿੱਲ ਕਿਸਾਨਾਂ ਉੱਤੇ ਅਜਿਹਾ ਕਹਿਰ ਢਾਹੇਗਾ ਅਤੇ ਉਹਨਾਂ ਕੋਲ ਬਚਣ ਦਾ ਕੋਈ ਰਸਤਾ ਹੀ ਨਹੀਂ ਬਚੇਗਾ, ਬਿਨ੍ਹਾਂ ਆਪਣੀਆਂ ਜ਼ਮੀਨਾਂ ਵੱਡੇ-ਵੱਡੇ ਸਰਮਾਏਦਾਰ ਪਰਿਵਾਰਾਂ ਨੂੰ ਵੇਚਣ ਦੇ। ਇਹ ਬਿਲ ਕਿਸਾਨਾਂ ਤੋਂ ਉਹਨਾਂ ਦਾ ਰੁਜ਼ਗਾਰ ਕਮਾਉਣ ਦਾ ਮੌਲਿਕ ਅਧਿਕਾਰ ਖੋਹ ਲਵੇਗਾ।
ਆਮ ਆਦਮੀ ਪਾਰਟੀ ਇਸ ਦਾ ਦੇਸ਼ ਭਰ ਵਿੱਚ ਵਿਰੋਧ ਅਤੇ ਰੋਸ ਪ੍ਰਦਰਸ਼ਨ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਆਮ ਲੋਕ ਅਤੇ ਸਾਡੇ ਲੱਖਾਂ ਵਲੰਟੀਅਰਜ਼ ਵੱਲੋਂ ਇਸ ਦੀ ਸ਼ੁਰੂਆਤ ੨੨ ਅਪ੍ਰੈਲ ਨੂੰ ਦਿੱਲੀ ਵਿੱਚ ਸੰਸਦ ਦਾ ਘਿਰਾਓ ਕਰਕੇ ਕੀਤੀ ਜਾਵੇਗੀ ।
ਇਸ ਰੋਸ ਪ੍ਰਦਰਸ਼ਨ ਵਿੱਚ ਲੁਧਿਆਣਾ ਦੇ ਕਨਵੀਨਰ ਅਹਿਬਾਬ ਸਿੰਘ ਗਰੇਵਾਲ ਅਤੇ ਫਤਿਹਗੜ੍ਹ ਸਾਹਿਬ ਦੇ ਕਨਵੀਨਰ ਨਰੇਸ਼ ਵਾਲੀਆ ਨੇ ਭਾਰੀ ਮਾਤਰਾ ਵਿੱਚ ਆਪ ਦੇ ਵਲੰਟੀਅਰਾਂ ਨਾਲ ਮਿਲਕੇ ਹਿੱਸਾ ਲਿਆ।
