ਨਵੀਂ ਦਿੱਲੀ (12 ਮਾਰਚ, 2016): ਮੁਸਲਿਮ ਸੰਗਠਨ ਜਮਾਇਤ ਉਲੇਮਾ-ਈ-ਹਿੰਦ ਵੱਲੋਂ ਕਰਵਾਏ ਰਾਸ਼ਟਰੀ ਏਕਤਾ ਸਮਾਗਮ ‘ਚ ਬੋਲਦਿਆਂ ਕਾਂਗਰਸ ਦੇ ਸੀਨੀਅਰ ਨੇਤਾ ਤੇ ਰਾਜ ਸਭਾ ‘ਚ ਵਿਰੋਧੀ ਧਿਰ ਦੇ ਨੇਤਾ ਗੁਲਾਮ ਨਬੀ ਆਜ਼ਾਦ ਨੇ ਕਿਹਾ ਕਿ ਮੁਸਲਮਾਨਾਂ ‘ਚ ਕੁਝ ਅਜਿਹੇ ਲੋਕ ਤੇ ਤਾਕਤਾਂ ਹਨ ਜੋ ਮੁਸਲਮਾਨਾਂ ਦੀ ਤਬਾਹੀ ਦੀ ਵਜ੍ਹਾ ਬਣ ਗਏ ਹਨ ਤੇ ਸਾਨੂੰ ਅਜਿਹੇ ਲੋਕਾਂ ਤੋਂ ਸੁਚੇਤ ਰਹਿਣਾ ਚਾਹੀਦਾ ਹੈ । ਉਨ੍ਹਾਂ ਕਿਹਾ ਕਿ ਇਸੇ ਲਈ ਉਹ ਆਈਐਸ ਜਿਹੇ ਕੱਟੜਵਾਦੀ ਸੰਗਠਨਾਂ ਦਾ ਵਿਰੋਧ ਕਰਦੇ ਹਨ ਜਿਵੇਂ ਆਰਐਸਐਸ ਦਾ ਵਿਰੋਧ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਹਰ ਧਰਮ ‘ਚ ਧਰਮ ਨਿਰਪੱਖ ਲੋਕ ਧਾਰਮਿਕ ਕੱਟੜਪੰਥੀਆਂ ਨਾਲ ਲੜ੍ਹ ਰਹੇ ਹਨ ।
ਕਾਂਗਰਸ ਦੇ ਸੀਨੀਅਰ ਨੇਤਾ ਤੇ ਰਾਜ ਸਭਾ ‘ਚ ਵਿਰੋਧੀ ਧਿਰ ਦੇ ਨੇਤਾ ਗੁਲਾਮ ਨਬੀ ਆਜ਼ਾਦ ਵੱਲੋਂ ਕੀਤੀ ਇਸ ਟਿੱਪਣੀ ਨਾਲ ਵਿਵਾਦ ਖੜਾ ਹੋ ਗਿਆ ਹੈ ।
ਭਾਜਪਾ ਤੇ ਆਰਐਸਐਸ ਨੇ ਇਸਦਾ ਤਿੱਖਾ ਵਿਰੋਧ ਕਰਦਿਆਂ ਕਿਹਾ ਕਿ ਉਨਾਂ ਭਾਰਤ ਨੂੰ ਕਥਿਤ ਤੌਰ ‘ਤੇ ਵੰਡਣ ਨੂੰ ਲੈ ਕੇ ਸੰਗਠਨ ਇਸਲਾਮਿਕ ਸਟੇਟ (ਆਈਐਸ) ਤੇ ਆਰਐਸਐਸ ਨੂੰ ਇਕ ਹੀ ਕਤਾਰ ‘ਚ ਖੜਾ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ ।
ਇਸ ਦੌਰਾਨ ਨਾਗਪੁਰ ‘ਚ ਆਰਐਸਐਸ ਨੇਤਾ ਨੰਦ ਕੁਮਾਰ ਨੇ ਆਜ਼ਾਦ ਦੇ ਆਈਐਸ ਤੇ ਆਰਐਸਐਸ ਨੂੰ ਇਕੋ ਜਿਹੇ ਕਹਿਣ ‘ਤੇ ਇਸਦੀ ਤਿੱਖੀ ਆਲੋਚਨਾ ਕਰਦਿਆਂ ਇਸ ਨੂੰ ਕਾਂਗਰਸ ਦਾ ਬੌਧਿਕ ਦਿਵਾਲੀਆਪਨ ਕਰਾਰ ਦਿੱਤਾ ਹੈ । ਭਾਜਪਾ ਦੇ ਰਾਸ਼ਟਰੀ ਜਨਰਲ ਸਕੱਤਰ ਸ਼੍ਰੀਕਾਂਤ ਸ਼ਰਮਾ ਨੇ ਵੀ ਆਜ਼ਾਦ ਦੇ ਬਿਆਨ ਨੂੰ ਮੰਦਭਾਗਾ ਕਰਾਰ ਦਿੰਦਿਆਂ ਆਰਐਸਐਸ ਨੂੰ ਰਾਸ਼ਟਰੀ ਸੰਗਠਨ ਦੱਸਿਆ ਹੈ । ਉਨ੍ਹਾਂ ਇਸ ਬਿਆਨ ਲਈ ਆਜ਼ਾਦ ਤੋਂ ਮਾਫੀ ਦੀ ਮੰਗ ਕੀਤੀ॥
