ਨਵੀਂ ਦਿੱਲੀ (12 ਅਕਤੂਬਰ , 2014) : ਇਥੇ ਇਕ ਸਮਾਗਮ ਦੌਰਾਨ ਫ਼ਿਰਕੂਵਾਦ ਦੀ ਰਾਜਨੀਤੀ ਨੂੰ ਜੜ੍ਹੋਂ ਉਖਾੜ ਸੁੱਟਣ ਦਾ ਪ੍ਰਣ ਲੈਂਦਿਆਂਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਇਹ ਦੇਸ਼ ਸਭਨਾਂ ਦਾ ਸਾਂਝਾ ਹੈ ਤੇ ਇਥੇ ਕੋਈ (ਘੱਟ-ਗਿਣਤੀ) ਕਿਰਾਏਦਾਰ ਨਹੀਂ। ਦੇਸ਼ ਦਾ ਨਾਂਅ ਰੌਸ਼ਨ ਕਰਨ ‘ਚ ਘੱਟ-ਗਿਣਤੀਆਂ ਨੇ ਕੋਈ ਕਸਰ ਨਹੀਂ ਛੱਡੀ।
ਉਨਾਂ ਆਪਣੀ ਪਾਰਟੀ ਅਤੇ ਅਪਣੇ ਆਪ ਨੂੰ ‘ਸੈਕੂਲਰ’ ਤੇ ਘੱਟ-ਗਿਣਤੀਆਂ ਦਾ ਸੱਚਾ ਹਿਤੈਸ਼ੀ ਦਸਦਿਆਂ ਕਿਹਾ ਕਿ ਉਨ੍ਹਾਂ ਨੂੰ ਕਿਸੇ ਵੀ ਘੱਟ-ਗਿਣਤੀ ਤੋਂ ਕੋਈ ‘ਅਲਰਜੀ’ ਨਹੀਂ ਹੈ।
ਭਾਜਪਾ ਦੇ ਮੁਸਲਮਾਨਾਂ ਪ੍ਰਤੀ ਨਜ਼ਰੀਏ ਦੀ ਆਲੋਚਨਾ ਕਰਦਿਆਂ ਉਨ੍ਹਾਂ ਕਿਹਾ “ਮੈਨੂੰ ਨਾ ਮੁਸਲਿਮ ਟੋਪੀ ਪਹਿਨਣ ਤੋਂ ਕੋਈ ਅਲਰਜੀ ਹੈ, ਨਾ ਸਿੱਖਾਂ ਤੋਂ ਕੋਈ ਦਿਕਤ ਹੈ, ਨਾ ਕਿਸੇ ਹੋਰ ਧਰਮ ਤੋਂ। ਪਰ ਪਿਛਲੇ 67 ਸਾਲ ਤੋਂ ਵੋਟ ਬੈਂਕ ਦੀ ਸਿਆਸਤ ਕਰ ਕੇ ਕਾਂਗਰਸ ਤੇ ਭਾਜਪਾ ਘੱਟ-ਗਿਣਤੀਆਂ ਨੂੰ ਆਪਸ ਵਿਚ ਲੜਾਉਂਦੀਆਂ ਆ ਰਹੀਆਂ ਹਨ।“
ਉਨ੍ਹਾਂ ਕਿਹਾ, “ਜਦ ਮੈਂ ਮਰਾਠੀ ਟੋਪੀ ਪਾਈ ਤਾਂ ਕਿਸੇ ਨੂੰ ਕੋਈ ਪਰੇਸ਼ਾਨੀ ਨਹੀਂ ਹੋਈ, ਪਰ ਮੈਂ ਮੁਸਲਿਮ ਟੋਪੀ ਕੀ ਪਾਈ, ਭਾਜਪਾ ਨੇ ਮੇਰੇ ਵਿਰੁਧ ਹੋ-ਹੱਲਾ ਖੜਾ ਕਰ ਦਿਤਾ।”
ਪਾਰਟੀ ਦੇ ਸੀਨੀਅਰ ਆਗੂ ਆਸ਼ੂਤੋਸ਼ ਨੇ ਭਾਜਪਾ ‘ਤੇ ਹਮਲਾ ਕਰਦਿਆਂ ਕਿਹਾ, “ਅੱਜ ਦੇਸ਼ ਵਿਚ ਅਜਿਹਾ ਖ਼ਤਰਨਾਕ ਰੁਝਾਨ ਪੈਦਾ ਕਰ ਕੇ ਸਾਬਤ ਕੀਤਾ ਜਾ ਰਿਹਾ ਹੈ ਕਿ ਘੱਟ-ਗਿਣਤੀਆਂ ਬਿਨਾਂ ਵੀ ਸਰਕਾਰ ਬਣਾਈ ਜਾ ਸਕਦੀ ਹੈ। ਪਰ ਭਾਜਪਾ ਨੂੰ ਚੇਤੇ ਰੱਖਣਾ ਚਾਹੀਦਾ ਹੈ ਕਿ 30 ਫ਼ੀ ਸਦੀ ਵੋਟਾਂ ਨਾਲ ਹੋਂਦ ਵਿਚ ਆਈ ਮੋਦੀ ਸਰਕਾਰ ਵੀ ਬਹੁਗਿਣਤੀ ਨਹੀਂ, ਇਕ ਘੱਟ-ਗਿਣਤੀ ਸਰਕਾਰ ਹੈ। ਅਸੀਂ ਤਾਂ ਦੇਸ਼ ਦੇ ਬਾਕੀ 70 ਫ਼ੀ ਸਦੀ ਲੋਕਾਂ ਲਈ ਸਿਆਸਤ ਕਰ ਰਹੇ ਹਾਂ।”
ਕੇਜਰੀਵਾਲ ਨੇ ਘੱਟ-ਗਿਣਤੀਆਂ ਨੂੰ ਭਾਰਤ ਦਾ ਸ਼ਿੰਗਾਰ ਮੰਨਦਿਆਂ ਕਿਹਾ , “ਜਦ ਮੈਂ ਦਿੱਲੀ ਦਾ ਮੁੱਖ ਮੰਤਰੀ ਬਣਿਆ ਤਾਂ ਮੈਂ ਨਾ ਤਾਂ ਮੌਲਾਣਿਆਂ ਦੀਆਂ ਰੁਕੀਆਂ ਤਨਖ਼ਾਹਾਂ ਦੇਣ ਤੋਂ ਪਿੱਛੇ ਹਟਿਆ ਅਤੇ ਨਾ ਹੀ ਨਵੰਬਰ 1984 ਬਾਰੇ ਵਿਸ਼ੇਸ਼ ਜਾਂਚ ਟੀਮ (ਐਸਆਈਟੀ) ਕਾਇਮ ਕਰਨ ਤੋਂ ਹੀ ਭਜਿਆ।
