ਅੰਮ੍ਰਿਤਸਰ (ਨਰਿੰਦਰ ਪਾਲ ਸਿੰਘ): ਸਾਲ 2010 ਵਿੱਚ ਸੋਧਾਂ ਦੇ ਨਾਮ ਹੇਠ ਮਿਲਗੋਭਾ ਬਣਾਕੇ ‘ਨਾਨਕਸ਼ਾਹੀ’ ਦੇ ਸਿਰਲੇਖ ਹੇਠ ਛਾਪਿਆ ਤੇ ਪ੍ਰਚਾਰਿਆ ਜਾ ਰਿਹਾ ਕੈਲੰਡਰ ਇੱਕ ਵਾਰ ਫਿਰ ਵਿਵਾਦਾਂ ਦੇ ਘੇਰੇ ਵਿੱਚ ਆ ਗਿਆ ਹੈ। ਗੁਰੂ ਸਾਹਿਬਾਨ ਨਾਲ ਸਬੰਧਤ ਦਿਹਾੜਿਆਂ ਦੀ ਤਾਰੀਖਾ ਵਿੱਚ, ਪਿਛਲੇ ਸਾਲ ਨਾਲੋਂ ਵੱਡਾ ਫਰਕ ਹੋਣ ਕਰਕੇ, ਸ਼੍ਰੋਮਣੀ ਕਮੇਟੀ ਦੀ ਕੈਲੰਡਰ ਕਮੇਟੀ 3 ਮਈ ਨੂੰ 11.00 ਵਜੇ ਇੱਕ ਵਾਰ ਫਿਰ ਸਿਰ ਜੋੜਕੇ ਬੈਠ ਰਹੀ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਸ਼੍ਰੋਮਣੀ ਕਮੇਟੀ ਦੀ ਧਰਮ ਪ੍ਰਚਾਰ ਕਮੇਟੀ ਵਲੋਂ ਮਾਰਚ ਮਹੀਨੇ ਹੀ ਬੜੇ ਹੀ ਜੋਰ ਸ਼ੋਰ ਨਾਲ ਰਲੀਜ ਕੀਤਾ ਗਿਆ ਸੰਮਤ 550 ਦਾ ਕੈਲੰਡਰ, ਹੁਣ ਤੀਕ ਲੱਖਾਂ ਦੀ ਗਿਣਤੀ ਵਿੱਚ ਛਪਵਾ ਕੇ ਵੰਡਿਆ ਵੀ ਜਾ ਚੁੱਕਾ ਹੈ ਪਰ ਅਚਨਚੇਤ ਹੀ ਇਸ ਅਨੁਸਾਰ ਆਣ ਵਾਲੇ ਗੁਰਪੁਰਬਾਂ ਦੀਆਂ ਤਾਰੀਖ ਵਿੱਚ ਸੰਮਤ 549 ਦੇ ਕੈਲੰਡਰ ਦੀਆਂ ਤਾਰੀਖਾਂ ਤੋਂ ਵੱਡਾ ਫਰਕ ਸਾਹਮਣੇ ਆਣ ਦਾ ਸ੍ਰੀ ਦਰਬਾਰ ਸਾਹਿਬ ਦੇ ਹੈੱਡ ਗ੍ਰੰਥੀ ਗਿਆਨੀ ਜਗਤਾਰ ਸਿੰਘ ਨੇ ਗੰਭੀਰ ਨੋਟਿਸ ਲਿਆ ਹੈ।
ਜਾਣਕਾਰਾਂ ਅਨੁਸਾਰ ਗਿਆਨੀ ਜੀ ਦੁਆਰਾ ਦਿੱਤੇ ਜੁਬਾਨੀ ਆਦੇਸ਼ ਤੇ ਕੈਲੰਡਰ ਕਮੇਟੀ ਦੇ ਮੈਂਬਰਾਂ ਦੀ ਹੰਗਾਮੀ ਇੱਕਤਰਤਾ 3 ਮਈ ਨੂੰ ਸਵੇਰੇ 11.00 ਵਜੇ ਬੁਲਾ ਲਈ ਗਈ ਹੈ। ਦੱਸਿਆ ਗਿਆ ਹੈ ਕਿ ਇਹ ਕਮੇਟੀ ਇਹ ਵਿਚਾਰ ਕਰੇਗੀ ਕਿ ਆਖਿਰ ਗੁਰੂ ਹਰਿਗੋਬਿੰਦ ਸਾਹਿਬ ਦੇ ਪ੍ਰਕਾਸ਼ ਦਿਹਾੜੇ, ਗੁਰਤਾ ਗੱਦੀ ਦਿਵਸ ਦੀਆਂ ਤਾਰੀਖਾਂ ਵਿੱਚ ਸੰਮਤ 549 ਨਾਲੋਂ 19-19 ਦਿਨ ਦਾ ਫਰਕ ਕਿਵੇਂ ਆ ਗਿਆ। ਜਿਕਰਯੋਗ ਹੈ ਕਿ ਕਮੇਟੀ ਦੁਆਰਾ ਰਲੀਜ ਕੀਤੇ ਸੰਮਤ 549 ਦੇ ਕੈਲੰਡਰ ਵਿੱਚ ਗੁਰੂ ਹਰਿਗੋਬਿੰਦ ਸਾਹਿਬ ਦਾ ਪ੍ਰਕਾਸ਼ ਦਿਹਾੜਾ 28 ਜੇਠ ਮੁਤਾਬਿਕ 10 ਜੂਨ 2017 ਸੀ ਜੋ ਇਸ ਵਾਰ ਸੰਮਤ 550 ਅਨੁਸਾਰ 15 ਹਾੜ ਮੁਤਾਬਿਕ 29 ਜੂਨ 2018 ਹੈ। ਇਸੇ ਤਰ੍ਹਾਂ ਛੇਵੇਂ ਪਾਤਸ਼ਾਹ ਨਾਲ ਸਬੰਧਤ ਮੀਰੀ-ਪੀਰੀ ਦਿਵਸ ਜੋ ਪਿਛਲੇ ਕੈਲੰਡਰ ਅਨੁਸਾਰ 19 ਹਾੜ ਮੁਤਾਬਿਕ 3 ਜੁਲਾਈ 2017 ਸੀ ਇਸ ਵਾਰ 7 ਸਾਵਣ ਮੁਤਾਬਿਕ 22 ਜੁਲਾਈ 2018 ਹੈ। ਗੁਰੂ ਗ੍ਰੰਥ ਸਾਹਿਬ ਦਾ ਪਹਿਲਾ ਪ੍ਰਕਾਸ਼ ਦਿਵਸ, ਸੰਮਤ 549 ਅਨੁਸਾਰ 7 ਭਾਦੋਂ ਮੁਤਾਬਿਕ 22 ਅਗਸਤ 2017 ਸੀ ਜੋ ਇਸ ਵਾਰ 25 ਭਾਦੋਂ ਮੁਤਾਬਿਕ 10 ਸਤੰਬਰ ਹੈ। ਦੱਸਿਆ ਗਿਆ ਹੈ ਕਿ ਇਸੇ ਤਰ੍ਹਾਂ ਬਾਕੀ ਗੁਰ ਦਿਹਾੜਿਆਂ ਵਿੱਚ ਵੀ ਫਰਕ ਹੈ।
ਪਰ ਸ੍ਰੀ ਅਕਾਲ ਤਖਤ ਸਾਹਿਬ ਦਾ ਸਿਰਜਣਾ ਦਿਵਸ ਪਿਛਲੇ ਸੰਮਤ 549 ਅਨੁਸਾਰ 18 ਹਾੜ ਮੁਤਾਬਿਕ 2 ਜੁਲਾਈ 2017 ਸੀ ਤੇ ਇਸ ਵਾਰ ਵੀ 18 ਹਾੜ ਮੁਤਾਬਿਕ 2 ਜੁਲਾਈ 2018 ਹੀ ਹੈ। ਪ੍ਰਬੰਧਕਾਂ ਵਲੋਂ ਬੜੇ ਹੀ ਗੁਪਤ ਢੰਗ ਨਾਲ ਬੁਲਾਈ ਗਈ ਕੈਲੰਡਰ ਕਮੇਟੀ ਇੱਕਤਰਤਾ ਕੀ ਫੈਸਲਾ ਲੈਂਦੀ ਹੈ ਇਹ ਤਾਂ ਸਮਾਂ ਹੀ ਦਸੇਗਾ ।
