ਮੁੰਬਈ: ਮਹਾਰਾਸ਼ਟਰ ਦੇ ਮਾਲੇਗਾਉਂ ‘ਚ 8 ਸਤੰਬਰ 2006 ਨੂੰ ਹੋਏ ਲੜੀਵਾਰ ਬੰਬ ਧਮਾਕਿਆਂ ਦੇ ਕੇਸ ‘ਚ ਇਥੇ ਇਕ ਵਿਸ਼ੇਸ਼ ਅਦਾਲਤ ਨੇ ਸਾਰੇ 9 ਮੁਸਲਿਮ ਨੌਜਵਾਨਾਂ ਨੂੰ ਸਬੂਤਾਂ ਦੀ ਘਾਟ ਕਾਰਨ ਬਰੀ ਕਰ ਦਿੱਤਾ।
ਇਸ ਬੰਬ ਕਾਂਡ ਦੀ ਸ਼ੁਰੂਆਤੀ ਦੌਰ ਵਿੱਚ ਕੀਤੀ ਜਾਂਚ ਦੌਰਾਨ ਆਮ ਕੇਸਾਂ ਦੀ ਤਰਾਂ ਮੁਸਲਮਾਨ ਭਾਈਚਾਰੇ ਨਾਲ ਸਬੰਧਿਤ 9 ਨੌਜਵਾਨਾਂ ਨੂੰ ਗ੍ਰਿਫਤਾਰ ਕੀਤਾ, ਪਰ ਜਿਉਂ ਹੀ ਜਾਂਚ ਅੱਗੇ ਵਧੀ ਤਾਂ ਇਸ ਵਿੱਚ ਹਿੂੰਦਤਵੀ ਜੱਥੇਬੰਦੀ ਅਖਿਲ ਭਾਰਤੀ ਵਿਦਿਆਰਥੀ ਪ੍ਰੀਸ਼ਦ ਦਾ ਨਾਮ ਸਾਹਮਣੇ ਆਇਆ ਅਤੇ ਬੰਬ ਬਲਾਸਟ ਵਿੱਚ ਵਰਤਿਆ ਹੀਰੋ ਹਾਂਡਾ ਮੋਟਰਸਾਇਕਲ ਹਿੰਦੂਤਵੀ ਸਾਧਵੀ ਪ੍ਰਗਿਆ ਠਾਕੂਰ ਦੇ ਨਾਮ ਸੀ ਅਤੇ ਇਸ ਦੌਰਾਨ ਹੀ ਭਾਰਤੀ ਫੌਜ ਦੇ ਲੈਫ: ਕਰਨਲ ਪ੍ਰਸਾਦ ਸ਼੍ਰੀ ਕਾਂਤ ਪ੍ਰੋਹਿਤ ਦੀ ਸ਼ਮੂਲੀਅਤ ਸਾਹਮਣੇ ਆਈ ਸੀ।
ਇਨ੍ਹਾਂ ‘ਚੋਂ ਇਕ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ ਬਾਕੀ ਜ਼ਮਾਨਤ ‘ਤੇ ਸਨ। ਸੋਮਵਾਰ ਨੂੰ ਮੁੰਬਈ ਦੀ ਵਿਸ਼ੇਸ਼ ਅਦਾਲਤ ਨੇ ਇਹ ਫੈਸਲਾ ਸੁਣਾਇਆ। ਬੰਬ ਧਮਾਕਿਆਂ ‘ਚ 37 ਲੋਕਾਂ ਦੀ ਮੌਤ ਹੋ ਗਈ ਸੀ ਜਦਕਿ 100 ਤੋਂ ਜ਼ਿਆਦਾ ਲੋਕ ਜ਼ਖਮੀ ਹੋ ਗਏ ਸਨ। ਬਚਾਅ ਪੱਖ ਦੇ ਵਕੀਲ ਸ਼ਾਹਿਦ ਨਦੀਮ ਅੰਸਾਰੀ ਨੇ ਦੱਸਿਆ ਕਿ ਮਾਮਲੇ ਦੇ ਸਾਰੇ ਨੌ ਕਥਿਤ ਦੋਸ਼ੀਆਂ ਵਲੋਂ ਬਰੀ ਕੀਤੇ ਜਾਣ ਦੀ ਪਟੀਸ਼ਨ ‘ਤੇ ਸੋਮਵਾਰ ਦੁਪਹਿਰ ਨੂੰ ਵਿਸ਼ੇਸ਼ ਮਕੋਕਾ ਅਦਾਲਤ ਨੇ ਇਹ ਫੈਸਲਾ ਸੁਣਾਇਆ।
ਇਸ ਖਬਰ ਨੂੰ ਅੰਗਰੇਜ਼ੀ ਵਿੱਚ ਪੜ੍ਹਨ ਲਈ ਵੇਖੋ:
Malegaon blast case: Eight framed Muslims discharged by Special Court
ਉਨ੍ਹਾਂ ਕਿਹਾ ਕਿ ਨੁਰੂਲ ਹੁਦਾ, ਰਈਸ ਅਹਿਮਦ, ਸਲਮਾਨ ਫਾਰਸੀ, ਫਾਰੂਕ ਮਗਦੁਮੀ, ਸ਼ੇਖ ਮੁਹੰਮਦ ਅਲੀ, ਆਸਿਫ ਖਾਨ, ਮੁਹੰਮਦ ਜਾਹਿਦ ਅਤੇ ਅਬਰਾਰ ਅਹਿਮਦ ਦੇ ਇਲਾਵਾ ਕੁਝ ਮਹੀਨੇ ਪਹਿਲਾਂ ਦੁਰਘਟਨਾ ‘ਚ ਮਾਰੇ ਗਏ ਸ਼ਬੀਰ ਅਹਿਮਦ ਨੂੰ ਬਰੀ ਕਰ ਦਿੱਤਾ ਗਿਆ ਹੈ। ਮਾਮਲੇ ਦੀ ਸ਼ੁਰੂਆਤੀ ਜਾਂਚ ਕਰਦੇ ਹੋਏ ਏ. ਟੀ. ਐਸ. ਨੇ ਇਨ੍ਹਾਂ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਇਨ੍ਹਾਂ ‘ਤੇ ਲਸ਼ਕਰ ਏ ਤਾਇਬਾ ਨਾਲ ਮਿਲ ਕੇ ਧਮਾਕਿਆਂ ਨੂੰ ਅੰਜ਼ਾਮ ਦੇਣ ਦਾ ਦੋਸ਼ ਸੀ।
