ਜਲੰਧਰ, ਪੰਜਾਬ (ਨਵੰਬਰ 03, 2013): ਬੀਤੇ ਦਿਨੀਂ (1 ਨਵੰਬਰ ਨੂੰ) ਜਲੰਧਰ ਵਿਖੇ ਸਿੱਖ ਜਥੇਬੰਦੀਆਂ ਵੱਲੋਂ “ਅਜ਼ਾਦੀ ਅਤੇ ਨਿਆਂ” ਮਾਰਚ ਕੀਤਾ ਗਿਆ ਜਿਸ ਮੌਕੇ ਗੁਰਦੁਆਰਾ ਮਾਡਲ ਟਾਊਨ (ਜਲੰਧਰ) ਵਿਖੇ ਸੰਗਤਾਂ ਦੇ ਭਰਵੇਂ ਇਕੱਠ ਨੂੰ ਸੰਬੋਧਨ ਕਰਦਿਆਂ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਦੇ ਸਾਬਕਾ ਪ੍ਰਧਾਨ ਅਤੇ ਅਕਾਲੀ ਦਲ ਪੰਚ ਪਰਧਾਨੀ ਦੇ ਮੌਜੂਦਾ ਸਕੱਤਰ ਜਨਰਲ ਭਾਈ ਮਨਧੀਰ ਸਿੰਘ ਨੇ ਕਿਹਾ ਕਿ ਜਦੋਂ ਵੀ ਕੋਈ ਘਟਨਾ ਵਾਪਰਦੀ ਹੈ ਤਾਂ ਉਸੇ ਵਕਤ ਉਸ ਸੰਬੰਧੀ ਸਹੀ ਨਤੀਜੇ ਕੱਢ ਲੈਣੇ ਆਮ ਮਨੁੱਖ ਦੇ ਵੱਸ ਦੀ ਗੱਲ ਨਹੀਂ ਹੁੰਦੀ ਉਸ ਜਦੋਂ ਉਸ ਘਟਨਾ ਨੂੰ ਵਾਪਰਿਆਂ ਕੁਝ ਸਮਾਂ ਹੋ ਜਾਵੇ ਤਾਂ ਇਸ ਬਾਰੇ ਨਤੀਜੇ ਕੱਢਣੇ ਕੁਝ ਅਸਾਨ ਹੋ ਜਾਂਦੇ ਹਨ।
ਉਨ੍ਹਾਂ ਕਿਹਾ ਕਿ ਬੀਤੀ ਸਦੀ ਵਿਚ ਉੱਤੇ-ਥੱਲੀ ਸਿੱਖਾਂ ਨੂੰ ਦੋ ਵੱਡੇ ਸਾਕਿਆਂ ਦਾ ਸਾਹਮਣਾ ਕਰਨਾ ਪਿਆ। ਇਕ ਸੀ ਜੂਨ 1984 ਦਾ ਦਰਬਾਰ ਸਾਹਿਬ ਉੱਤੇ ਹਮਲਾ ਅਤੇ ਦੂਜਾ ਸੀ ਨਵੰਬਰ 1984 ਦਾ ਘਾਣ। ਇਨ੍ਹਾਂ ਦੋਹਾਂ ਘਟਨਾਵਾਂ ਤੋਂ ਬਾਅਦ ਸਿੱਖ ਪੰਥ ਵਿਚ ਵੱਖ-ਵੱਖ ਵਿਚਾਰ ਪ੍ਰਫੁੱਲਤ ਹੋਏ ਜਿਨ੍ਹਾਂ ਦੀਆਂ ਮੁੱਖ ਦੋ ਧਾਰਵਾਂ ਬਣੀਆਂ। ਇਕ ਵਿਚਾਰ ਇਹ ਸੀ ਕਿ ਭਾਰਤੀ ਢਾਂਚੇ ਦੇ ਅੰਦਰ ਰਹਿ ਕੇ ਇਨਸਾਫ ਹਾਸਲ ਕੀਤਾ ਜਾ ਸਕਦਾ ਹੈ ਅਤੇ ਦੂਜੀ ਧਾਰਾ ਸਿੱਖ ਜੁਝਾਰੂਆਂ ਦੀ ਸੀ ਜਿਨ੍ਹਾਂ ਇਹ ਸਿੱਟਾ ਉਦੋਂ ਹੀ ਕੱਢ ਲਿਆ ਸੀ ਕਿ ਇਨ੍ਹਾਂ ਮਹਾਂ-ਜੁਰਮਾਂ ਦੇ ਦੋਸ਼ੀਆਂ ਨੂੰ ਭਾਰਤੀ ਢਾਚੇ ਅੰਦਰ ਕਦੇ ਸਜ਼ਾ ਨਹੀਂ ਮਿਲੇਗੀ ਅਤੇ ਇਨ੍ਹਾਂ ਮਾਮਲਿਆਂ ਵਿਚ ਇਨਸਾਫ ਹਾਸਲ ਕਰਨ ਦਾ ਇਕੋ-ਇਕ ਰਸਤਾ ਸਿੱਖ ਪਰੰਪਰਾ ਅਨੁਸਾਰ ਪਾਪੀ ਨੂੰ ਦੰਡ ਦੇਣ ਦਾ ਹੈ।
ਉਨ੍ਹਾਂ ਕਿਹਾ ਕਿ ਨਵੰਬਰ 1984 ਦੇ ਮਾਮਲਿਆਂ ਵਿਚ ਬੀਤੇ ਤੀਹ ਸਾਲਾਂ ਦੀ ਕਾਰਵਾਈ ਨੇ ਸਿੱਖ ਜੁਝਾਰੂਆਂ ਦੇ ਫੈਸਲੇ ਨੂੰ ਸਹੀ ਸਾਬਤ ਕੀਤਾ ਜਿਨ੍ਹਾਂ ਜੂਨ 1984 ਦੇ ਦੋਸ਼ੀ ਅਰੁਨ ਵੈਦਿਆ, ਨਵੰਬਰ 1984 ਦੇ ਦੋਸ਼ੀ ਲਲਤ ਮਾਕਨ, ਅਰਜਨ ਦਾਸ ਅਤੇ ਧਰਮ ਦਾਸ ਸ਼ਾਸਤਰੀ ਨੂੰ ਸਿੱਖ ਪਰੰਪਰਾਵਾਂ ਅਨੁਸਾਰ ਸਜ਼ਾ ਦਿੱਤੀ।
ਉਨ੍ਹਾਂ ਕਿਹਾ ਕਿ ਜਿਹੜੇ ਸਿੱਖ ਅਜੇ ਵੀ ਭਾਰਤੀ ਢਾਂਚੇ ਅੰਦਰ ਇਨਸਾਫ ਦੀ ਆਸ ਰੱਖਦੇ ਹਨ ਉਹ ਦਰਅਸਤ “ਊਠ ਦਾ ਬੁੱਲ੍ਹ ਡਿੱਗਣ ਦੀ ਆਸ” ਰੱਖ ਰਹੇ ਹਨ, ਜੋ ਕਦੇ ਵੀ ਪੂਰੀ ਨਹੀਂ ਹੁੰਦੀ ਹੁੰਦੀ।
ਉਕਤ ਖਬਰ/ਲਿਖਤ ਅੰਗਰੇਜ਼ੀ ਵਿਚ ਪੜ੍ਹੋ:
