ਬਰਨਾਲਾ, (11 ਅਕਤੂਬਰ,2014) : ਸਿਮਰਨਜੀਤ ਸਿੰਘ ਮਾਨ ਦੀ ਅਗਵਾਈ ਵਾਲੇ ਅਕਾਲੀ ਦਲ ਦੇ ਵਰਕਰਾਂ ਨੇ ਪਿਛਲੇ ਦਿਨੀਂ ਆਰ. ਐਸ.ਐਸ. ਤੇ ਸਿਵਸੈਨਾ ਵੱਲੋਂ ਮਾਰੂ ਹਥਿਆਰਾਂ ਨਾਲ ਲੈਸ ਹੋ ਕੇ ਬਰਨਾਲਾ ਸ਼ਹਿਰ ਵਿੱਚ ਕੀਤੇ ਗਏ ਫਿਰਕੂ ਮਾਰਚ ਦੇ ਵਿਰੋਧ ਵਿੱਚ ਅੱਜ ਸ੍ਰੋਮਣੀ ਅਕਾਲੀ ਦਲ (ਅ) ਜਿਲਾ ਬਰਨਾਲਾ ਵੱਲੋਂ ਵੀ ਰੋਸ ਮਾਰਚ ਕੀਤਾ ਗਿਆ।
ਪੁਰ ਅਮਨ ਕੀਤੇ ਗਏ ਇਸ ਰੋਸ ਮਾਰਚ ਵਿੱਚ ਸ਼ਾਮਿਲ ਪਾਰਟੀ ਵਰਕਰਾਂ ਅਤੇ ਸ਼ਹਿਰੀਆਂ ਨੂੰ ਸੰਬੋਧਨ ਕਰਦਿਆਂ ਜਿਲਾ ਪ੍ਰਧਾਨ ਸ੍ਰ. ਰਣਜੀਤ ਸਿੰਘ ਸੰਘੇੜਾ ਨੇ ਕਿਹਾ ਕਿ ਜੇ ਕੋਈ ਫਿਰਕੂ ਸੰਗਠਨ ਭਵਿੱਖ ਵਿੱਚ ਅਜਿਹੀ ਮਾਹੌਲ ਖਰਾਬ ਕਰਨ ਵਾਲੀ ਕਾਰਵਾਈ ਕਰਨ ਦਾ ਯਤਨ ਕਰੇਗਾ ਤਾਂ ਅਕਾਲੀ ਦਲ (ਅ) ਦੇ ਵਰਕਰ ਉਨਾਂ ਨੂੰ ਅਜਿਹਾ ਨਹੀਂ ਕਰਨ ਦੇਣਗੇ ਅਤੇ ਹਥਿਆਰਾਂ ਦਾ ਪ੍ਰਦਰਸ਼ਨ ਕਰਨ ਵਾਲੇ ਫਿਰਕੂ ਸੰਗਠਨਾਂ ਦੇ ਹਥਿਆਰ ਖੋ ਕੇ ਪੁਲਿਸ ਥਾਣਿਆਂ ਵਿੱਚ ਜਮਾ ਕਰਾਉਣਗੇ।
ਉਹਨਾਂ ਸ਼ਹਿਰੀਆਂ ਨੂੰ ਅਜਿਹੇ ਫਿਰਕੂ ਲੋਕਾਂ ਦਾ ਸਾਥ ਨਾ ਦੇਣ ਦੀ ਅਪੀਲ ਵੀ ਕੀਤੀ। ਜਿਕਰਯੋਗ ਹੈ ਕਿ ਗੁਰਦੁਆਰਾ ਨਾਨਕਪੁਰਾ ਗੱਡਾਖਾਨਾ ਚੋਂਕ ਬਰਨਾਲਾ ਤੋਂ ਸ਼ੁੂਰੂ ਹੋਏ ਇਸ ਰੋਸ ਮਾਰਚ ਦੇ ਰੂਟ ਨੂੰ ਬਰਨਾਲਾ ਪੁਲਿਸ ਨੇ ਬੜੀ ਹੁਸ਼ਿਆਰੀ ਨਾਲ ਮੇਨ ਬਜਾਰ ਕੱਟ ਕੇ ਕੱਚਾ ਕਾਲਜ ਰੋਡ ਦੇ ਰਸਤੇ ਬਾਹਰ-ਬਾਹਰ ਡੀਸੀ ਦਫਤਰ ਪੁੱਜਦਾ ਕਰ ਦਿੱਤਾ।
ਜਿੱਥੇ ਦਲ ਦੇ ਆਗੂਆਂ ਵੱਲੋਂ ਡੀਸੀ ਬਰਨਾਲਾ ਨੂੰ ਆਰ ਐਸ ਐਸ ਅਤੇ ਸਿਵਸੈਨਾ ਵਰਗੇ ਫਿਰਕੂ ਸੰਗਠਨਾਂ ਦੇ ਮਾਹੌਲ ਖਰਾਬ ਕਰਨ ਵਾਲੇ ਮਾਰਚਾਂ ਤੇ ਪਾਬੰਦੀ ਲਾਉਣ ਸੰਬੰਧੀ ਮੰਗ ਪੱਤਰ ਦਿੱਤਾ ਗਿਆ
